Trabaonan di restructuracion di aparato gubernamental ta bayendo bon

​

Prome Evelyn Wever-Croes:

ORANJESTAD (AAN): E siman aki Prome Minister Evelyn Wever-Croes a reuni cu representantenan di Departamento di Recurso Humano y a haya un presentacion di e prome conclusionnan di e estudio riba restructuracion di aparato gubernamental. Esaki ta un estudio cu lo tuma su tempo, y lo tin resultadonan importante pa Aruba.

   Gabinete Wever-Croes desde inicio di gobernacion, ta tumando pasonan pa haci e aparato gubernamental mas eficiente pa mehora mas ainda e servicio na ciudadanonan. Den e cuadro aki, tin dos proyecto grandi andando, restructuracion di e aparato gubernamental y e proyecto di e-Government.

   Prome Minister a indica cu e trabaonan di restructuracion di e aparato gubernamental, den cuadro di e plannan di reforma, Landspakket, a palabra cu Hulanda cu nan lo duna asistencia den esaki y Hulanda a ‘engaged’ PriceWaterHouse Coopers pa haci estudio con por optimalisa e aparato gubernamental.

   Trabaonan ya a cuminsa y a reuni cu tur departamento di Gobierno. E prome resultado a keda cla y dialuna ultimo Prome Minister a haya un presentacion pa Departamento di Recurso Humano di e resultado preliminar di estudio aki.

   Prome Minister a remarca cu den e estudio a tene cuenta cu diferente tarea. Cua ta e tareanan cu segun ley e departamentonan mester haci y cua tareanan e departamentonan ta haci cu no ta cay segun ley. Tambe a pone atencion na e tareanan cu lo por worde privatisa y cua ta e tareanan cu mester stop. Tambe den e estudio a conclui cua ta e tareanan cu mester worde haci y no ta worde haci y con pa structura esakinan miho posibel.

   E departamentonan cu ta resorta bou di Ministerio di Asuntonan General y Infrastructura a pasa den e proceso aki y DRH hunto cu Prome Minister a repasa e conclusionnan di e estudio. A base di e conclusionnan aki, lo sigui cu e siguiente fase den cual lo bin cu proposicionnan concreto kico ta e tareanan cu lo por privatisa entre otro, pa asina restructura e aparato gubernamental y hacie mas eficiente.

   “Na final di dia, e aparato gubernamental mester ta mas eficiente, cu suficiente empleado cualifica y cu tur herment y ekipo pa duna e miho servicio posibel na ciudadanonan di Aruba. Esey ta nos compromiso y nos lo percura pa cumpli cu ne”, Prome Minister a duna di conoce.