The content originally appeared on:
Diario
Directora di DTI Richella Dorothal:
ORANJESTAD (AAN) – Directora di Departamento di Inspeccion Tecnologico (DTI), señora Richella Dorothal, a duna di conoce den entrevista cu DIARIO, cu control riba construccionnan ta tumando lugar tur dia, y e plan di accion ta bay ta aworaki cu enfoke riba otro establecimentonan, en combinacion cu e proyectonan di construccion.
Dorothal a menciona cu tin biaha cu e contratistanan no ta cumpli manera mester ta, cu e parti di seguridad y si ta varios biaha cu DTI ta atende nan riba mesun punto, ta yega momento cu ta para e trabaonan y si ta riba un riesgo hopi halto ta wordo para di biaha. “Pues, e controlnan ta tumando lugar, regularmente” Richella Dorothal a remarca.
El a agrega cu mayoria di companianan ta cumpli cu e tarea cu nan tin cu haci, of cu e instruccionnan cu nan ta haya. DTI ta duna informacion ki tipo di trabao e compania ta eherciendo y ki tipo di material mester wordo uza pa esaki. “Tin biaha cu e trahado mes, maske su doño di trabao a dun’e tur e tools necesario pa e bisti, su zapato of handschoen di seguridad, e no ta haci esaki. Tin biaha e trahado mes tin falta den esaki”, Richella Dorothal a comenta.
Dorothal a indica cu trahadornan di DTI ta haci control riba e sector di HORECA, nan ta atende cu e “lift keuring” tambe, constantemente, y nan ta tuma nota tambe di cosnan cu no ta cuadra. El a informa tambe cu e Luna di Mei aki tin un accion di diferente area.
El a señala cu e leynan cu tin mester di ahustacion, mientras hopi cambio a tuma lugar e leynan ta basta bieu. El a reitera cu mester ahusta e leynan y trece un maneho nobo.
