The content originally appeared on:
Diario
Raymond Hernandez, Director ANA:
*Y wak kico ta e situacion den Caribe
ORANJESTAD (AAN) – Raymond Hernandez, Director di Archivo Nacional Aruba (ANA), den conferencia prensa a menciona cu e Simposio Herencia Digital a wordo presenta caba for di aña pasa, y e ta accesible online caba, y a presenta e concepto aki riba un plataforma internacional den Caribe aña pasa.
“Aña pasa tambe nos a presenta esaki na Sint Maarten, den un setting di esclavitud. Pero nos a dicidi cu, como Coleccion Aruba, nos kier haci e plataforma algo pa mustra, en todo caso, cu Caribe Hulandes tin un potencial cu loke nos a crea aki. Anto den cuadro di esey, nos a dicidi cu como plataforma nos ta organiza un siman cu ta bay riba e tema di con nos ta conecta nos informacionnan riba herencia cultural, di tur e islanan cu tin den Caribe, pero tambe di e material cu tin na Hulanda, con nos ta inter-conecta nan di un forma digital. P’esey nos ta organizando e evento aki, cu yama ‘Dutch Caribbean Digital Heritage Week’.
E prome dos dianan ta basicamente pa un publico un poco mas grandi, den sentido cu nos a haci un forma di simposio pa dos dia, na unda cu ta bay hopi informacion, entre otro, riba nos Plataforma mes, na unda nos ta mustr’e como modelo, y banda di dje nos tin informacionnan di diferente instancia internacional. Entre otro, Mericano, den e caso aki ‘Internet Archaic’ cu a bira nos plataforma cu ta carga e coleccion.aw aki”, Raymond Hernandez a señala.
El a agrega cu tambe tin instancianan Hulandes cu lo ta bishitando e website e siman aki, pa hunto intercambia y wak kico ta e situacion den Caribe. “P’asina nos yega na un nulmeting, pa wak con leu e cooperacion por sigui den e Caribe Hulandes pa cuminza”, Raymond Hernandez, director di ANA, a indica.
Banda di e dos dianan di simposio tin dianan di sesionnan interno p’asina ey discuti cu otro ki forma di cooperacion digital ta bay tin y con un plataforma asina por funciona pa Caribe Hulandes.
“E ultimo dia nos lo cera cu un wrap up, pa bin cu recomendacionnan pa nos gobiernonan, pa nos instancianan, mas halto, den e casonan aki cu institutonan na Hulanda, entre otro, cu mester coopera cu nos pa nos yega na e tipo di samenwerking aki. Pues, banda di lanza e website den su bachi nobo, nos kier logra fortifica e cooperacion den Reino Hulandes, pa medio tambe di intercambio digital di materialnan historico, cultural y tambe informacionnan cu ayera mes a sali”, Raymond Hernandez a señala.
