The content originally appeared on:
Diario
Pelea riba caya na San Nicolas
ORANJESTAD (AAN): Diabierna mainta e acusado D.B. di 42 aña, a scucha Hues confirma e exigencia di Fiscal cu ta 12 luna di prison pasobra el a pone un ciudadano di inicial F.R. perde un wowo. E acusacion contra D.B. ta cu riba 21 September 2023, el a maltrata hunto cu otronan e ciudadano F.R. na forma violento y pisa, caminda a hinca dedenan of un obheto den su wowonan. Fiscal ta considera esaki maltrato severo na un lugar publico.
Victima ta malo: Ta asina cu e victima F.R. no a presenta. Fiscal a duna Hues un email cu F.R. a manda pa Ministerio Publico, caminda e ta bisa cu e no por presenta den Corte pasobra e ta sinti malo door di e maltrato cu el a sufri. El a pidi un daño di 50 mil Florin. Hues a reacciona cu si F.R. no ta presente, no por trata e asunto di daño material.
Bati victima den grupo: Hues a puntra D.B. si ta berdad y el a bisa cu F.R. a bay busca problema. El a bisa cu no ta asina cu F.R. a pidie pa wak pa su auto, manera F.R. ta bisa. Hues a mustra cu na Polis D.B. a bisa cu el a bringa cu F.R. door cu F.R. no a pag’e.
Segun e acusado D.B., e persona F.R. a cuminsa tira palabra p’e y na dado momento el a perde cabez y a bay dal F.R. algun mokete y e amigo di D.B, a dal’e y despues un grupo cu tabata eybanda a bay bati F.R.
Riba preguntanan di Hues, D.B. a desmenti di a hinca dede den wowo ni a usa obheto skerpi den wowo di F.R. Segun D.B., ta gaña F.R. ta gaña djis pa sera D.B.
Hues a mustra cu F.R. a declara cu e tabata na Roxy Bar den Caya Grandi di San Nicolas hunto cu su primo ta hunga billiard. Banda di 3:30’or marduga el a bay busca cuminda pa un di e muhernan den e bar. Ora el a bolbe, el a para den parkinglot tras di e bar. El a topa e acusado D.B. y a puntr’e si e por wak pa su auto. Segun F.R., el a duna D.B. 10 Florin. El a bay hiba e cuminda den e bar y ora el a bolbe, el a mira D.B. y un otro homber para su dilanti. Nan a bringa cun’e y el a resisti. Segun e victima F.R., na dado momento D.B. a pidi un grupo pa yud’e y nan a sigui bati’e. F.R. a subi auto bay cas.
Victima a perde un wowo: Su siguiente dia, F.R. a bay ImSan pa su wowonan cu tabata hopi dolor. E relato oficial di Husticia ta indica cu na ImSan a dun’e Paracetamol y mand’e cas. Sinembargo F.R. a sigui sinti hopi dolor y a bay su docter di cas.
Ora e Docter di Cas a mire, el a core bis’e pa e bay urgente un Specialista di Wowo. El a bay docter Walter kende a bis’e cu tur dos wowo tin un scheur den dje y cu mester worde opera urgente. Esey a socede tambe. Despues di operacion a constata cu F.R. no por wak cu su wowo drechi.
Recherche a saca potret di e wowonan cu ta mustra blauw pero e parti paden di e cashi di wowo. Ta asina cu e specialista di wowo a traha un raport cu ta mustra cu tur dos wowo tin corta den dje. Esaki por worde ocasiona door di sla duro of cu un obheto di hero. Mester a opera e wowonan pero F.R. no por wak cu e wowo drechi.
Hues a mustra cu na SVb, e victima F.R. a bisa cu a rasca cu huña den su wowo. Expertonan di SVb a constata cu oficialmente F.R. a bira ciego na e wowo drechi.
Hues a bisa cu e ruman homber morocho di D.B., M.B., a bisa na Polis, cu e tabata eynan y a gara F.R. y D.B. a dal’e. Despues un grupo di 9 pa 10 hende a bay bati F.R. Segun D.B., e tin 19 aña sin mira su ruman morocho y cu nan no ta bon cu otro. El a desmenti cu su ruman morocho tabata eynan.
Fiscal: Fiscal a bisa Hues cu e ta haya proba cu D.B. a maltrata e homber F.R. y cu F.R. a sufri lesion den su wowonan. Fiscal a mustra cu tin diferente declaracion entre otro di Docter di Cas, e Docter na ImSan, e specialista di wowo y docter di SVb, cu a constata cu F.R. ta ciego na e wowo drechi. Fiscal a bisa Hues cu D.B. a dal F.R. y mas hende a maltrata F.R. Esaki a causa cu F.R. a sufri herida severo. Fiscal a bisa cu ta horibel loke a pasa cu F.R. cu a perde su wowo drechi. Ta un hecho hopi serio.
Pa cu e castigo, Fiscal a bisa cu e ta tene cuenta cu ta promer biaha cu D.B. a cay sera pa un delito asina. El a exigi 12 luna di prison, di cual 3 luna luna ta condicional cu un tempo di prueba di 2 aña.
Abogado: Abogado mr. Kuster a bisa Hues cu ta lamentable loke a sosode cu F.R. El a bisa cu D.B. a bisa cu el a dal F.R. pero despues un grupo grandi di homber a ataca F.R.
Segun abogado, e victima F.R. a bisa cu ora e grupo a atak’e, un a primi na su wowonan. E abogado a bisa, cu no tin imagen di video di seguridad pa mira kico a sosode y no tin declaracion di otronan cu tabata presente. E abogado ta haya cu tin mucho duda cu ta D.B. a dal F.R. na su wowo. No por bisa cu ta e sla di D.B. a causa cu F.R. a perde su bista.
Sentencia: Hues a sera tratamento di e caso y a dicta sentencia di biaha. Hues a bisa cu e ta haya proba cu D.B. hunto cu otronan a maltrata F.R. y a hinca dede den su wowonan. Hues ta haya cu D.B. ta complice di loke a sosode. Na opinion di Hues, no ta importante ta kende a hinca dede den wowo. Ora ta complice, e ta haya e mesun castigo.
Pa cu e castigo, Hues a bisa cu e ta tene cuenta cu nunca antes D.B. tabata deteni pa delito di violencia. Hues tambe ta tene cuenta cu F.R. no por wak cu su wowo drechi. Esey ta un caso serio. Hues ta haya e castigo exigi pa Fiscal na su lugar. Hues a condena D.B. na 12 luna di prison, di cual 3 luna ta condicional y un tempo di prueba di 2 aña.
