The content originally appeared on:
Diario
Cambio den strafwet ta e causa
ORANJESTAD (AAN): Apenas Diadomingo dia 21 di April den oranan laat di anochi, el a dal un peaton mata cu su auto riba caminda di Aeropuerto pa Playa na altura di Camacuri. Polis a mira cu e chauffeur ta mustra di ta bao inlfuencia, y ora cu a lage supla riba e aparato di Alco Sensor IV, esaki a mustra un cifra den ‘microgram per liter’ cu ya a sobrepasa e limite legal di Aruba. Pues e tabata burachi y a keda deteni, y transporta den Vehiculo special (manera por mira riba e potret) rumbo pa Warda di Polis.
E relato oficial di vocero di Polis ta indica: “Polis a acerca e chauffeur na unda ta constata cu e lo ta bao influencia alcohol y ta bay over na test e. Mirando e resultado a detene e chauffeur di e vehiculo KIA Sportage.”
Sorprendentemente ya caba riba Diamars atardi pa anochi a haya sa cu e chauffeur di e Kia Sportage color preto cu number A-18809 ta liber. E por keda cana rond y sigui core auto of vehiculo, pendiente di su caso.
Den pasado, pa casonan asina e persona ta keda encarcela debi cu el a comete un infraccion sumamente serio, unda un persona a perde su bida door di su culpa.
Sinembargo awor aparentemente cu cambio di strafwet na Aruba, e lineanan cu autoridad tin di sigui den cierto casonan a conoce un cambio drastico. Esey ta inclui personanan gara burachi tras di stuur.
Ora di haci test cu e Alco Sensor IV, si acaso e resultado a pasa e limite legal, pero toch ta menos cu 560 µg/l, no ta necesario pa e detenido keda encarcela mas, ni su rijbewijs lo wordo kita. E lo por haya un rijverbod pa algun ora.
Solamente si e persona a supla na e aparato di Alco Sensor IV, y e resultado ta mucho mas cu 560 µg/l como nivel di alcohol den su curpa, e ora si ta duna autoridad hudicial OK pa e keda deteni, y tambe posiblemente pa su rijbewijs wordo kita.
Pues e persona masculino ta liber, pero tin di aparece den Corte si acaso Ministerio Publico pusha su caso pa bay dilanti Huez.
