The content originally appeared on:
Diario
Dr. Edward Cheung y su casa
ORANJESTAD (AAN): Dialuna atardi tabata un momento special, pa e ingeniero di Aruba trahando pa NASA, esta Dr. Edward Cheung a bay observa e Eclipse Total di Solo cu tabata visible na un gran parti di Merca.
Segun el a splica, pa como 3 aña el a planea nan viahe pa bay mira e Eclipse Solar aki na pueblo di Kerrville na Texas. Esaki ta situa como 70 kilometer Noordwest di San Antonio (Texas). Esey ta debi cu NASA a prepara pa planea un Evento Live for di Kerrville, y Dr. Edward Cheung a uni como boluntario pa yuda durante e Eclipse Festival aki.
Sinembargo como tres siman pasa, ora cu e pronostico di tempo a drenta pa parti zuid di Texas, cu horor por a mira cu lo bay tin nubia na cantidad, y esaki lo bay stroba un berdadero Eclipse Festival di socede.
Esey ta e momento cu Dr. Cheung y su casa, a tuma e decision cu nan lo sigui tras di solo, y a opta pa bay mire na Albany na New York.
Den fin di siman nan a viaha cu avion pa Albany, y ora di yega eynan riba Diadomingo a huur un vehiculo y a core bay nort pa Norwich na estado di Vermont. Na final nan a escoge como pueblo di Newport na Vermont como e lugar pa mira e Eclipse Solar, como cu lo bay tin cielo sin nubia e atardi ey.
Dialuna mainta nan a sali, y den 1 ora y mey a yega na Newport, Vermont, cu ta keda cerca di frontera cu Canada. Nan a bin topa cu un Veld di Softball, y a haya un lugar pa staciona nan vehiculo. Aki na e veld, nan a cera amistad cu dos persona cu un bunita Telescoop. Ta trata di un ciudadano y su yiu homber, y ambos ta gran fanatico di NASA.
Dr. Cheung a probecha pa traha un caha special pa yuda mira e Eclipse, un tiki mas “avanza” cu loke el a traha biaha pasa na Aruba pa e Eclipse Parcial. El a corta un buraco pa pone un lens, y parti paden a pega papel blanco, y cu un espacio pa mira den dje. Y e caha a funciona perfecto, pasobra hasta e manchanan di solo (“sun spots”) tabata visible danki na e caha.
Y asina atardi finalmente e Eclipse a cuminsa, y tur hende na e veld a cuminsa bira mas ancioso. Ora cu porfin e luna a tapa e solo completo, e corona den cielo y tur e zona rond di nan den scuridad, a pone cu publico a bira hopi excita cu e fenomeno celestial aki.
Por a mira e prominence cora briyante rond di e rand di solo constantemente. Tambe como cu a bira scur, por a mira Jupiter y Venus na ambos banda di corona. Den un rato tambe por a sinti manera temperatura a baha unda e Eclipse ta tumando lugar.
Dr. Edward Cheung y su casa Agnes e ora a probecha di e Eclipse Total, pa saca un potret cu e bandera di Aruba. E potret aki ta pa cortesia di Justin Materazo. Un momento special, y por mira tambe potret cu el a saca for di su telescoop di e eclipse total.
Na final ora cu e Eclipse a finalisa, Dr. Cheung y casa a prepara pa core 4 ora pa regresa Albany. Pero debi cu trafico a bira inmensamente congestiona, e coremento ey a dura en total 8 ora. Pues na Albany a haya apenas 4 ora so di drumi, pa despues bay Aeropuerto y subi avion pa regresa Phoenix (Arizona) unda e ta trahando riba un proyecto.
