The content originally appeared on:
Diario
Ningun relato mes di Banco Central
Lo a prohibi Truck Blinda di cierto compania subi nan tereno
Comerciantenan local ta suplica pueblo yuda cu plac’i moneda
ORANJESTAD (AAN): E ta algo cu a cuminsa wordo nota ya di fin di luna di November 2023. Diripiente Comerciantenan na Aruba a bin confronta cu tabata dificil pa haya placa larga fo’i cierto banco. Esaki na forma instantaneo a pusha algun negoshi local den un skina dificil con pa atende placa pa usa como cambio (of ‘buelta’) na momento cu clientenan ta bin paga cu placa di papel pa servicio of producto.
Tabatin dado momento scarcedad di moneda di 1 Florin, y despues pa varios siman a bira dificil pa haya 10 cent, y tambe moneda di 25 cent. Hopi hende a pensa cu kizas ta debi cu ta temporada di Fin di Aña, y e situacion lo por drecha unabes cu aña 2024 habri.
E speransa ey a evapora rapidamente ora cu na final di Januari 2024, e situacion di scarcedad pa haya placa larga a bira mas alarmante. Aunke bo tin di paga un comision pa cambia placa di papel pa placa di moneda, toch algun Banco tabata informa cu nan no tin placa larga den stock.
Di con ta scars: Di con tin scarcedad? E Bank Tellernan mes no tabata sa e motibo, pues e Comerciante tambe ta keda cu hopi ‘vraagtekens’ den cabes y sali bay for di edificio di Banco pensando ta con ta bay haci.
Na final di Januari 2024 a sali un publicacion riba Social Media, di un Comerciante local kende a busca informacion, y a bin haya sa cu tur cos a cuminsa den forma di un supuesto conflicto entre e fuente di stock di placa moneda, esta Banco Central, y un compania local di Truck Blinda cu diripiente no a wordo permiti mas haya acceso riba nan tereno.
Pues e Trucknan Blinda no por subi tereno di Banco Central pa entrega of ricibi placa larga. E prohibicion di e Truck di e cierto compania aki a pone cu varios Comerciante tin dolor inmenso di cabes pa por obtene placa chikito.
Esaki a pone cu varios Comerciante abiertamente ta haci suplica na tur ciudadano cu tin hopi placa larga, pa por fabor yuda nan.
Tabatin Banco si cu tabatin stock grandi di placa moneda, y nan si tabata sigui yuda. Esey tabata toch un tiki alivio. Kizas e Banco ey ta usa otro compania di Truck Blinda pa busca placa.
Durante luna di Februari 2024 a haya indicacion cu tabatin scarcedad di moneda di 10 cent y tambe di 25 cent atrobe. Pues indicacion cu e problema no a wordo soluciona. Esaki a keda hinca Comerciantenan den dificultadnan. Cliente cu drenta negoshi cu papel di 100 Florin, tabata wordo nenga como cu e Cashier no tin suficiente placa larga pa debolbe.
Trucks not welcomed: Aunke oficialmente no a duna ningun detaye, a bin haya sa cu e compania di Truck Blinda a cambia di gerencia algun luna pasa. Bao di maneho nobo, e compania aki diripiente a bin cu varios cambio, incluyendo nan a stop di haci pago di overtime. Siendo cu nan tabata keda pone trahadornan di Truck sigui traha. Pero sin cu nan ta haya pago, nan a dicidi pa no acepta trabaonan di overtime mas.
Gerencia nobo a pensa riba un solucion genial: Nan a busca trahadornan indocumenta di exterior pa asina core cu e Trucknan aki durante horario di overtime, incluyendo weekend. E trahadornan y Sindicato a protesta, y Gobierno a cay aden y di anochi pa mainta e trahadornan indocumenta a desaparece.
Observadornan ta kere cu ora cu Banco Central a haya sa cu e Trucknan Blinda aki tin trahador indocumenta ta subiendo nan tereno, pesey a pone un stop abrupto y a prohibi e compania aki di haci esey. Sinembargo oficialmente ningun boletin a ser emiti riba esaki.
Y esaki posiblemente ta e hecho cu ainda aworaki na luna di Maart, tin scarcedad di placa larga. E potretnan aki saca den fin di siman, ta mustra cu tin lugar cu scarcedad di 1 Florin y tambe di 5 Florin y ta pidi nan clientenan pa yudansa.
Pues ta pidi comunidad pa kibra nan spaarpot, y yuda nan cu cualkier placa larga. Sea ta di 10 cent, 25 cent, 1 Florin, of di 5 Florin.
E scarcedad di placa larga no ta djis afecta comercio, sino hasta e trahadornan cu tin biaha ta depende di e placanan larga aki pa haya un tip na nan trabao for di clientenan.
