Razzia marduga na Madiki a yuda intercepta hopi droga mes

Dos hende deteni y a haya arma di candela tambe

ORANJESTAD (AAN): Despues di hopi investigacion, vigilancia, y datonan compila, a haya finalmente luz berde di Ministerio Publico pa tene un razzia di sorpresa riba un cas cu ta riba radar di autoridad como un ‘centro di droga’.

   Pesey mes, diferente unidad di Polis a yega marduga pa reuni y delibera e plan, y asina prome cu solo a sali nan a yega di sorpresa na e cas na Madiki, y tene un razzia bon coordina eynan.

   E biaha aki, e entrada hudicial a wordo ehecuta pa Unit Narcotica di Cuerpo Policial Arubano.  Esaki ta relaciona cu bendemento di droga y posesion di arma di candela.

   A sorprende e hendenan na e cas, y pone nan hands-up y a controla nan.  E oficialnan hudicial di Unit Narcotica a haci dos detencion.   Ta trata di e homber di inicial G.E.E. di 29 aña naci na Aruba, y e muhe di inicial M.L.M.M di 23 aña naci na Hulanda.

   Na e cas a bin haya y confisca cu cantidad droga cu ta cocaina, marihuana y ecstasy (XTC).

   Pa colmo, durante buskeda a haya un arma di candela y un municion cu a wordo confisca pa mas cu e investigacion.

   Pa cu e accion diferente departamento di KPA a forma parti. Ta trata di K9-Unit, Team di Aresto y polis uniforma di Noord.

   Cuerpo policial Aruba ta haci un suplica, cu si bo sa algo of bo a wak algo yama e tipline di Polis cu ta 111-41. Bo ta keda anonimo.