Corda inscribi online pa bo por wordo atendi na Tienda di Ley di Diasabra

ORANJESTAD (AAN): Manera cu DIARIO a trece dilanti, Facultad di Ley di Universidad di Aruba a habri Tienda di Ley atrobe.

E servicio ta brinda conseho legal na personanan cu tin pregunta of problema legal y cu no tin suficiente recurso pa paga un experto legal.

   E ayudo ta inclui conseho skirbi y asistensia pa yena formularionan legal riba diferente tema, manera derecho laboral, huur, contract, areglo di pago y divorcio, entre otro. Si e caso ta demasiado complica, Tienda di Ley por orienta e persona pa acudi na e instancia apropia.

   Tienda di Ley ta brinda conseho legal, pero no ta representa personanan den procedura legal.

   E ta gratis, sinembargo bo tin di registra di antemano pa por atende.  E prome ta Diasabra 31 di October.

   Pa registra bay na e website aki:

www.tinyurl.com/tdley

   Tienda di Ley lo tuma luga na Universidad di Aruba y lo ta habri riba e siguiente fechanan:  E ta Diasabra 31 di October 2026.  Tambe lo tin Diasabra 28 di November 2026.  Tambe riba Diasabra 12 di December 2026.

   Un biaha mas, corda cu pa un consulta mester di un cita. Pa haci un cita bo por yena e formulario di inscripcion via e website menciona na halto.