Firmamento di MOU entre Aruba y Corsou ta avance importante pa importacion di carni for di Colombia

Ministro Geoffrey Wever:

• Esaki ta un paso importante pa diversifica mercado 

ORANJESTAD (AAN): Despues di mas di tres aña di negociacion, preparacion y perseverancia, Aruba ta marca un paso importante pa diversifica su mercado di importacion y fortalece siguridad alimenticio.

  Aruba a logra un avance importante den e trayectoria pa importa carni directamente for di Colombia. Awe, Minister di Salubridad, Asuntonan Social, Cuido di Adulto Mayor y Maneho di Adiccion, Mervin Wyatt-Ras, y Minister Boekhoudt di Corsou a firma un Memorandum of Understanding (MOU), cu ta establece un paso importante den e cooperacion entre ambos pais pa facilita e proceso di importacion di carni Colombiano pa Aruba.

E firma aki ta resultado di un trayectoria cu a cuminsa na 2023, ora cu Minister di Finansa, Asunto Economico y Sector Primario, Geoffrey Wever, na e momento Minister di Asunto Economico, Comunicacion y Desaroyo Sostenibel, a lidera un mision comercial na Colombia. Durante e mision aki, cu a tuma lugar di 23 te cu 27 di mei 2023, a sostene reunionnan cu autoridadnan Colombiano, incluyendo Instituto Colombiano Agropecuario (ICA) y Instituto Nacional de Vigilancia de Medicamentos y Alimentos (INVIMA), pa explora e posibilidad di importa carni di calidad na un prijs mas economico pa mercado Arubano.

Desde e inicio tabata cla cu importacion di carni no ta solamente un asunto comercial. E proceso ta exigi cumplimento cu normanan sanitario internacional, evaluacion tecnico, coordinacion entre autoridadnan y diferente acuerdo juridico pa garantisa siguridad di e productonan.

A pesar di e esfuerzonan inicial, durante e periodo di maneho anterior no a logra finalisa e proceso. Sin embargo, Minister Wever a mantene e iniciativa riba su agenda economico, convencí di e importancia di habri mercado nobo y crea mas opcion pa importadornan y consumidornan di Aruba.

Cu e entrada di e actual Gobierno, Minister Wyatt-Ras y su equipo di consehora y cu ayudo di DVG a logra identifica, hunto cu Corsou, un solucion pa haci un siguiente paso concreto. E cooperacion aki a culmina awe den firma di e MOU.

“Desde 2023 nos a cuminsa traha pa habri e mercado di Colombia pa Aruba. E proceso no tabata facil, pero nos no a laga e meta cay. Cu cooperacion di Gobierno di Corsou nos a logra un solucion cu ta permiti nos sigui dilanti. Awe nos ta marca un paso importante den un trayectoria cu tin como objetivo trece mas opcion y productonan mas economico pa pueblo di Aruba,” Minister Wever a expresa.

Un di e metanan principal di e iniciativa ta pa amplia e cantidad di mercado for di cual Aruba por importa productonan alimenticio, y asina crea condicionnan pa mas competencia y prijsnan mas atractivo.

Aruba ta depende pa gran parti di importacion pa suministra su mercado local. Cambionan internacional den prijs, transporte y disponibilidad di producto ta afecta directamente e costo di bida di nos famianan.

Segun Minister Wever, carni Colombiano ta representa un oportunidad pa introduci un producto di calidad na un prijs potencialmente mas economico cu algun di e alternativanan actualmente disponible riba mercado Arubano.

“Nos sa cu prijsnan den supermercadonan ta halto y cu desaroyonan internacional hopi biaha ta pone mas presion riba cartera di nos famianan. P'esey nos ta traha activamente pa habri mercado nobo y crea mas oportunidad pa importa productonan di calidad na prijsnan mas accesibel. Nos meta ta pa e beneficio aki eventualmente yega cerca consumidor,” Minister Wever a indica.

E iniciativa ta cuadra cu e direccion di maneho di Programa di Gobernacion AVP-FUTURO 2025–2028, cu ta contempla fortalecemento di relacionnan comercial regional, diversificacion economico y mehoramento di poder di compra.

Minister Wever a expresa su aprecio pa e cooperacion di Gobierno di Corsou, cu a desempeña un papel importante den e avance logra. Minister Wever ta gradici Minister Boekhoudt y su ekipo, como tambe Gobierno di Corsou, pa nan disposicion pa coopera cu Aruba den e proceso. Segun Wever, e cooperacion aki ta demostra cu e paisnan den Reino por fortalece otro y logra metanan comun compartiendo experiencia, conocimiento y solucionnan.

“Nos tur ta paisnan chikito y cerca di otro. P'esey nos mester sigui busca manera pa coopera y fortalece otro. Awe Corsou ta yuda Aruba den e trayectoria aki, y Aruba tambe ta dispuesto pa comparti su experiencia y conocemento den otro proyectonan. Hunto nos por logra mas pa nos paisnan y nos region,” Minister Wever a enfatisa.

Cu e firma di e MOU, e proceso ta drenta un siguiente fase. Ainda ta resta pa finalisa e aspecto huridico y posteriormente firma un acuerdo cu e autoridadnan competente na Colombia, prome cu importadornan local por cuminsa importa carni directamente for di eynan.

Minister Wever a expresa su speranza cu e pasonan cu falta por wordo completa den algun luna, pa e mercado Arubano por beneficia di e oportunidad comercial nobo aki.

Finalmente, Minister Wever a expresa su gradecimento y felicitacion na Minister Wyatt-Ras y su ekipo pa nan compromiso y trabao pa negocia y logra e acuerdo di cooperacion aki. Tambe a gradici señora Dijkhoff-Pita di Departamento di Asunto Economico, señora Briceño di Directie Volksgezondheid, e conseheronan involucra y tur e instancianan cu a contribui pa haci e avance aki posibel.

“E firmamento di awe ta un momento importante. Nos lo sigui traha pa finalisa e trayectoria, cu e meta pa nos importadornan por trece carni for di Colombia y crea mas opcion na prijsnan mas economico pa nos comunidad. Esaki ta e resultado cu nos kier logra pa Aruba,” Minister Wever a conclui.