The content originally appeared on:
Diario
Democracia no ta permiti informacion falso pa cumpra hobennan
Cuanto aña di servicio Aruba a paga Mike for di Januari 1986?
Hubentud mester conoce e berdad di e caida financiero di Aruba
ORANJESTAD (AAN): Dia Prome di Januari 1986, Aruba a bira pais autonomo den Reino.
Na 1983, Reino Hulandes a bay di acuerdo pa dia Prome di Januari 1986 Aruba haya su Status Aparte, cu no tabata solamente un grito politico.
Na man di Betico Croes, na 1983 Aruba a logra e victoria grandi di aceptacion di Status Aparte door di Reino.
E Betico Croes a logra a bira porta pa otro politiconan asumi poder. Politiconan cu a opone e lucha di Betico Croes, enemigonan di Betico Croes y hasta algun di Status Aparte, a confabula un gobierno pa asina deshaci di Betico Croes como lider di e prome Gobierno di Aruba.
Mike Eman tabata ruman di e persona di Henny Eman cu a logra bira Prome Ministro di Aruba a base di e coalicion cu a wordo forma pa asumi poder dia Prome di Januari 1986.
Asina Mike Eman a haci su entrada tambe den mundo politico di Aruba y a bira coordinador di Gobierno di su ruman, Henny Eman.
For di e momento por bisa, cu casi na forma permanente, Mike Eman tabata den empleo di Pueblo di Aruba. Prome como Coordinador di su ruman.
Pa un periodo di 1992 pa 2001 el a traha na oficina di Notario, despues ta wordo bisa cu el a drenta bida politico, cu realmente for di su nacemento tabata su ambiente.
Mike a nace politico y a keda politico te awe y conoce trabou den Parlamento. E pregunta ta bira awor, kico el a haci como politico pa Aruba, cu na 2009 a entregue mando di e pais.
Mester admiti cu Mike Eman ta conoci cu e arte di cumpra curazon di Pueblo, loke a conduci na e logronan politico pa su persona cu a ocupa cantidad di puesto politico cu ta su herencia tambe.
Pero kico Mike a haci cu Aruba, cu semper a el a sa di atrae cu su habilidadnan magico di politico.
Rapportnan ta papia un idioma sumamente cla. Rapportnan cu ta haci necesario pa lanza e pregunta, con un persona cu a destrui Aruba financieramente, awe kier continua cu su participacion politico cu realmente por considera su pan di cada dia durante e parti mas grandi di su bida.
Importante pa Aruba ta bira, si e generacion nobo cu Mike Eman ta trata di atrae pa ocupa puestonan cu personanan cu a ocupa puestonan importante den AVP, a bandona pa awe no sostene e partido mas.
Awe generacionnan nobo mester wordo confronta cu problema grandi cu e personanan cu tabata tin e experiencia di atende cu Mike Eman, a bira lomba pa su persona y partido.
Generacionnan nobo mester wordo informa na forma concreto di e herencia di Mike Eman cu den e rapport “Bo Aruba” ta wordo pinta den su realidad.
Generacionnan hoben awe mester wordo presenta cu e realidad di entre otro e rapport “Bo Aruba” cu ta splica kico Mike a haci cu un parti grandi di e 1.6 Biyon Florin cu su partido a duna su persona pa inverti den adelanto di Aruba.
Con Mike Eman tin e curashi pa awe atrobe trata na cumpra curazon di Aruba, ta e pregunta grandi si lesa e rapport “Bo Aruba” cu ta mustra con resultado financiero di loke el a haci cu Hospital, a wordo calcula pa 653 Miyon, loke ta motibo cu cuido medico ta costoso na Aruba pasobra ta costo di cuido ta dicidi pa prijs di cuido.
Hobennan mester lesa rapportnan cu ta splica con asbest tabata kima riba dak di Hospital y pone enfermonan y personal na careda.
Hobennan mester tuma nota di e capacidad di Mike Eman pa percura pa hospital keda inunda.
Awe hobennan mester wordo informa con Gobierno Evelyn Wever Croes tabata na careda pa hospital por a bira e centro medico cu e ta, hustamente na tempo pa por a confronta Pandemia Covid-19.
Awe e votadornan hoben di Aruba mester puntra, kico a pasa realmente cu e brug nobo cu ta parti di e proyecto Green Coredor cu un totalidad di gasto calcula na 292 Miyon.
Na careda Aruba tabata cu e herencia di brug di Mike Eman, ora auto a cay den abismo pasobra vangrail no por a evita esaki.
Un eleccion nobo ta dilanti porta.
Mike Eman, cu Reino mester a baha for di Toren di Fort Zoutman, kier bolbe. Mester informa hobennan debidamente y pone cifranan y informacionnan corecto riba mesa pa evita ripiticion di e desastre gubernamental mas serio cu Aruba a yega di conoce, cu ta e gobernacion di Mike Eman cu a marca record pa su estadia den politica cu ta su logro mas grandi den bida.
