Corte ta boga pa amplia educacion moral y etica den enseñansa di e islanan

The content originally appeared on: Diario

President mr. Maurits de Kort


Su deseo pa sigui duna formamento na docentenan 

ORANJESTAD (AAN): Siman pasa a tuma lugar na Palacio di Husticia na Playa, un sesion di instalacion di Corte Comun di Husticia, di dos Hues cu ta mr. Petrus Pijnenburg y mr. Jojanneke Brandt.  Tambe a duna presentacion di e Procurador General di Aruba, esta mr. Amalin Flanegin.  Tambe a hiba palabra, decano di Abogadonan na Aruba, esta mr. Grasita Griffith.

   E persona cu a hiba palabra principal tabata mr. Maurits de Kort, kende ta presidente di Corte Comun di Husticia.  Durante su discurso, el a bay un rato den direccion di enseñansa na e islanan di Caribe, y tambe e discusion riba e atencion pa idioma na scolnan, y ta kere cu tanto den enseñansa primario y avansa, enseñansa profesional, y den e educacion permanente, ta un yudansa grandi pa trata idiomanan den Reino na forma igual.

   Educacion di tur hende: Un aspecto di enseñansa cu mr. de Kort a desea di menciona ta, cu educacion ta mucho mas cu idioma y rekenen.  Un docente tambe ta un ehemplo moral pa alumno- y studiantenan.  Esaki ta specialmente berdad den un sociedad den cual algun mayor tin di labora 2 of 3 trabao pa por sobrevivi fin di luna.  Unda hopi mayor riba nan so tin di cria nan yiunan, cu ta inclui garantisa nan pa cuminda y bebida di tur dia y un dak riba nan cabes.

   Den e situacion ey, ta imposible pa laga e formamento moral di muchanan cay solamente riba schouder di e mayornan.  Al fin al cabo, “it takes a village to raise a child’, pues incluyendo docentenan.  Laga nos pues bay envolvi docentenan tambe y capacita nan pa nan asumi un parti di e formamento moral y etica di nos yiunan.

   Esaki tambe ta rekeri algo di formamento continuo pa docentenan.  Moderniza e condicionnan di enseñansa ta implica mucho mas cu djis instala airco den klasnan.  Ta crucial pa nos permiti nos docentenan pa mantene nan habilidadnan y conocemento na tur momento, pero tambe sigui formando nan y comprometiendo nan mas ampliamente.  Kende ta corda e docente ey, cu ta keda pa resto di bo bida ta dunando sosten?  Via e imagen cu bo ta haya di dje, of di e atencion personal y e orea cu semper ta cla pa scucha bo?

   Envolvimento di docentenan: Segun mr. de Kort, di e forma aki, e docentenan lo por mustra tur dia loke moral y etica ta nifica den bida real.  Y esey ta crucial pa e educacion di nos yiunan.  Pa loke e nifica biba den un sistema democratico, den un estado di derecho.  Y di loke ta pidi di bo, pa asina yuda construi un sociedad habitabel.

   E educacion etico ey den realidad ta un tarea di nos tur, sin importa unda cu bo ta.  Y como Corte di Husticia, nan tambe ta sinti e responsabilidad ey.  Como cuidador di ley, y como faro di husticia, Corte kier haci nan parti den esaki cu tur nan amor.  Djis pa e motibo aki, nan ta apoya educacion permanente, di e forma cu nan por.

   Como Corte, nan tin nan mesun Hof Academy, unda nan coleganan por sigui ricibi les continuo.  Gobierno di Aruba tin su mesun Land Aruba Academy.  Y den e cadena di husticia, lo ta bon pa e lesnan aki bira obligatorio den e Landsverordening pa Abogadonan, y tambe e Landsverordening di Deurwaarder.  Como Corte, nan a yega di duna e conseho aki caba anteriormente na Ministro di Husticia di Aruba, y na otro paisnan.

   Vision amplio di educacion: Segun mr. de Kort, educacion ta un tema importante den ley y derecho.  Den derecho civil, un barera di idioma por tin influencia riba un caso.  Den derecho di famia, e escogencia di scol di muchanan (door di mayornan) por ta un issue.  Den derecho penal, tin biaha ta necesario pa tene cuenta cu e nivel educativo desaroyo di un acusado.

   Y pesey e President di Corte Comun di Husticia ta boga pa un vision amplio di educacion moral y etica den enseñanza na e islanan Hulandes den Caribe:  Cu areglo na ki norma nos ta biba den nos sociedad?  Kico esaki nifica pa respeta bida di otro, di e integridad di curpa di otro, y di propiedad di hende?

   El a splica cu como Corte, nan ta apoya e formamento y enseñansa semper cu nan por. Nan por yuda difundi e conocemento di ley, na esun cu ta compronde e proceso hudicial, y asina educa tur habitante riba e forma con funcionamento di ley ta.

   Nan ta haci esaki den nan ‘Open Dag’, den summer courses y ora di core stage.  Hueznan di islanan Caribe Hulandes ta dispuesto pa duna conferencia na Universidadnan y lo contribui cu placer cu cursonan di formamento profesional.