Piscadonan tambe ta reclamando cu nan kier haya acceso bek na costa

Ciere di costa tin miles di hende disgusta

• Carta fuerte manda Diamars pa Prome Ministro Eman
• Mas gremio den comunidad cu ta contra e payasada aki 

ORANJESTAD (AAN): Aki por mira copia di un carta, cu ta demostra con den forma di union entre piscadornan na Aruba, a ser manda pa Prome Ministro Mike Eman riba e situacion urgente cu ta pasando.

   A cera full e costa panort di e isla, y awor bo por yega eynan solamente riba bais of canando na pia.

   Imaginabo un piscado cu ta captura pisca desde decadanan caba na baranca, awor no por bay cu nan pickup of nan jeep bieu cu nan bakinan di anzue, palo, icejug y mas pa pone pisca captura aden.  Nan lo mester bay cana cu tur esakinan riba nan lomba?  Of lastra nan cu bais?

   E carta ta menciona cu recientemente varios piscado, tanto di baranca, reda, tirado di taray, y tirado di Lionfish (‘Lionfish Hunters’), a keda confronta cu nan lugarnan usual, tin cu pa decadanan y generacionnan tabata bay pisca na costa, tabata cera cu baranca y di e forma aki acceso di piscadonan diripiente a keda kita sin mas, sin aviso previo, sin consulta, y sin alternativa.

   For di perspectiva di piscadonan, esaki no ta aceptabel y sumamente preocupante y hasta indignante.  Fundacion Centro di Pesca Hadicurari a keda acerca pa varios representanet di piscadonan y den un comision mixto kier vocifera e siguiente peticion na Gobierno di Aruba.

   Pesey via e carta, nan ta pidi atencion inmediato di Gobierno y instancianan concerni pa atende den forma contundente e derecho tradicional indigeno di piscadonan pa yega na nan lugarnan di pesca na costa.

   (1) Ta pidi pa duna ordo pa dentro di mas corto tempo posibel habri acceso atrobe pa piscadonan por eherce nan ofishi tradicional cu ta di importancia pa produccion di alimento, yuda combati especie invasivo y hasta parti di nan pan di cada dia.

   (2) Ta pidi Gobierno y instancianan concerni pa prome cu caso di Corte relaciona cu asunto di ceramento di caminda na costa panort, garantiza e piscadonan cu nan derecho di acceso ta keda respeta debidamente.

   (3) Adicionalmente ta pidi Gobierno pa prome cu pensa pa haci cualkier cambio cu ta afecta piscadonan pa por fabor scucha y considera e punto di bista di piscadonan y involucra piscadonan den formulacion di decision.

   Nan ta pidi un contesta pa e peticionnan aki prome cu 10 di September 2026 venidero (of fecha di caso di Land y ACF vs. ABC) sino como comision lo sigui encamina procesonan necesario pa salvaguardia derecho di piscado.

   E carta a wordo firma pa Arthur Giel (SCPH), John Henriquez (Union Piscado), Anita Arfman (CLA), Marvin Thiel (BBFA), y Edward Dirksz (BBFA).