Curpa sin bida haya na costa di Bachelor’s Beach na San Nicolas

Den estado avansa di descomposicion

• Autoridad no sa su identidad 

ORANJESTAD (AAN): Tabata Dialuna pa mas o menos 6:14’or di mainta, Central di Polis a wordo notifica cu na costa di Bachelor’s Beach, pues e area pariba di Anker Cora, hendenan ta mirando un curpa cu parce no tin bida.

   Central di Polis ta despacha patruya di San Nicolas na e lugar pa check kico ta pasando.  Tambe a cuminza manda demas autoridadnan halto pa ta na altura di esaki.

   E prome unidad di Polis di San Nicolas cu a yega, enberdad a bin topa cu un curpa sin bida band’i costa y den un estado avansa di descomposicion.

   Ta trata di un hende homber y su identidad no ta conoci.

   Investigacion a start: Na e lugar a presenta e team forensico di BFTO, Docter Forensico, Departamento di Recherche San Nicolas, UMM (Unit Mensenhandel Mensensmokkel) y Bureau Slachtofferhulp.  A start mesora cu un investigacion rond di esaki.

   Team Forensico di Polis a tuma tur detaye di e area. Departamento di Brandweer tambe a presenta pa asina duna un man na polis.

   Aki ta bay haci analisis di coriente di lama pa asina bin cu hipotesis ta “for di cua direccion” e curpa aki lo a drief te yega na Aruba.  Lama tabata basta bruto ultimo simannan, pues ta check si cualkier boto cu tabata pasando den e area lo a kapseis of sink.  Tambe ta check posibel caso unda hendenan lo a cay for di boto.

   E teorianan lo ta bastante, y pa haya mas yudansa lo tin di check instancianan di paisnan den vecindario.  Tin indicacion cu e curpa a wordo dera mesora, mirando su estado.

  Cuerpo Policial Aruba ta pidi pa esun cu sa algo of a wak algo pa yama e tipline di Polis cu ta 111-41. Bo ta keda anonimo.