Curpa di Glenn Obispa a wordo haya den mondi na Primavera

E tabatin 18 dia perdi

ORANJESTAD (AAN): Den edicion di Dialuna mainta, DIARIO a indica cu ya ta 18 dia caba cu e ciudadano Glenn Obispa ta perdi riba e isla.  Famianan ta buscando mas di dos siman caba p’e.

    Sinembargo, Dialuna pa mas o menos 10:49’or di mainta Central di Polis a wordo notifica cu un ciudadano canando riba Watty Vos Boulevard, banda pariba, a nota un curpa humano den e pida mondi ey na Primavera.

   Varios unidad di Polis a bay na e area aki, y algun cien meter panort di rotonde di Wayaca, a bin nota cu den e pida mondi diki aki tin un curpa sin bida di un hende homber.  A nota cu e ta den estado avanza di descomposicion.

   Mesora a core yama demas oficialnan halto pa yega eynan, incluyendo team forensico di BFTO, y Recherche di Oranjestad.  Personal di Bureau Slachtofferhulp tambe a yega.

   Docter Forensico di Polis tambe a yega, y a constata morto di e persona.  El a wordo identifica como Glenn Marlon Helmut Obispa, naci na Aruba dia 24 di November 1957 (pues e tin 68 aña di edad.)  E mesun dia ey e tin 18 dia perdi y ningun hende no sa unda e ta.  Su famianan ta di Caya Huan Pablo II na Dakota.

      E ultimo biaha cu a mir’e tabata Diahuebs 20 di Augustus 2026, pues exactamente 18 dia pasa.  Riba e fecha ey, Glenn a meld y a keda na un Stichting no leu di Dakota y a bay for di eynan algo despues di 6’or di atardi.

   E momento ey e tabata bisti cu un camisa color berde (hunter), carson color preto, pechi color shinishi, su tas chikito preto y rugtas color bruin.

   Den su rugtas tin un saco cu paña entre otro un camisa beige cu strepi hoki-hoki color preto, un camisa color cora, un camisa color blanco, un carson khaki y mea (no sa color).

   Famianan a splica cu Glenn tin problema di salud y no a bay cu su remedinan. Glenn tin problema di rudianan pues e no por cana hopi ni bon.

   Glenn ta conoci pa bay for di cas entre 5 pa 10 dia pero nunca pa asina largo.  Y semper a logra hay’e e camindanan cu e mes a bisa cu e lo ta y a ser mira semper den e dianan cu e sa bay pa famia of conocir.

   Pero e biaha aki e no a ser haya ni mira cual a haci cu a notifica Cuerpo Policial y tur instancia concerni.

   Su buskeda a finaliza Dialuna mainta.  Na famia di e fayecido, DIARIO y Cuerpo Policial ta extende palabranan di profundo condolencia.