Kingdom Startup Program ta specialmente diseña pa introduci studiantenan universitario na mundo di comercio y innovacion

Minister Gerlien Croes:

ORANJESTAD (AAN): Minister di Educacion, señora mr. Gerlien Croes, tabata presente na e introduccion y presentacion oficial di e Kingdom StartUp Program. E programa aki ta fungi como un proyecto academico cu e meta pa fortalece cooperacion entre e islanan den Caribe Hulandes y duna un impulso innovativo na educacion universitario. E iniciativa pionero aki ta un programa di 6 siman specialmente diseña pa introduci studiantenan universitario na e mundo di comercio y innovacion, transformando nan conocemento academico den solucionnan practico pa desafionan real di nos region.

Cooperacion den Caribe Hulandes: Conectando Aruba, Curaçao y Sint Maarten

Durante e presentacion, e curiculo di e programa a wordo comparti conhuntamente cu mision y vision tras di cada tayer. KSP ta uni e talentonan di Universidad di Aruba (UA), Universidad di Curaçao (UoC), y Universidad di Sint Maarten (USM). E programa aki ta bay mas aya di fronteranan geografico, construyendo un colaboracion regional solido unda universidadnan, sector priva, publico y socionan regional ta traha hunto. Mediante e alianza aki, e studiantenan di e diferente islanan no solamente ta siña hunto, sino cu nan ta traha riba desafionan local comparti den areanan clave manera sostenibilidad, diversificacion economico, salud, y transformacion digital. Durante e encuentro, tur e gruponan local y regional a haya oportunidad pa splica un tiki mas di e idea cu nan ta desaroyando. E cooperacion aki ta wordo reforsa pa medio di mentornan local y internacional cu ta guia e hobennan den e desaroyo di nan ideanan.

Innovacion den Educacion: For di Teoria Academico pa Impacto Real

Tradicionalmente, universidadnan ta hunga un papel crucial den forma e talento di mañan. Sinembargo, KSP ta trece innovacion educativo den nos region pa medio di conecta teoria academico cu aplicacion practico. E programa ta hiba e studiantenan for di nan intuicion pa siña traha a base di evidencia y testnan practico.

Utilisando metodologianan di nivel mundial manera Lean Startup, Business Model Canvas, y Design Thinking, e studiantenan ta siña con pa Identifica problemanan real di e comunidad y areanan di oportunidad. Consecuentemente, nan lo enfoca riba haci entrevista y test prototipo directamente cu clientenan potencial.

E enfoke practico aki no solamente ta desaroya un mentalidad empresarial (entrepreneurial mindset), si no cu e ta duna e studiantenan e hermentnan y recurso necesario pa explora e caminda aki como un carera profesional.

Siman Presencial na Aruba y 'Showcase Day'

E programa ta wordo ofreci den un formato hybrido. Pues, un momento crucial lo ta den luna di juli 2026, ora cu e participantenan di e islanan bishita Aruba pa e "Customer Discovery Week". E siman aki lo inclui investigacion di veld, tayernan specialisa y un recepcion unda e studiantenan por conecta cu fundadornan y e mercado local.

E programa lo culmina den luna di augustus 2026 cu e "Showcase Week" cu lo tuma luga na Universidad di Aruba. Riba e 'Showcase Day' final, e ekiponan lo presenta nan proyectonan dilanti di inversionistanan y lidernan di e ecosistema. E ekiponan ganador lo por ricibi mini-grants pa sigui desaroya nan proyecto y drenta den programanan di incubacion.