Overtime no mester ta un solucion permanente

Hose Figaroa di FTA:

ORANJESTAD(AAN): Recientemente DIARIO a entrevista presidente di sindicato FTA Hose Figaroa riba e escases di trahador den sector di horeca y el a splica cu for di basta tempo caba tin kehonan di miembronan di FTA cu e presion di trabao a subi hopi, door di falta di trahador.

“Unda cu antes un restaurant por ehempel tabata draai den un anochi cu 12 pa 15 waiter, aworaki bo ta draai cu 8 of 10, pues esey ta pone cu e trahadornan ta haci nan best pa yuda, pero esey ta haci cu hopi biaha e peso ta bira mas y e cantidad di ora ta  bira mas”.

E trahadornan tin cu traha overtime y na comienso e overtime ta bunita pasobra bo ta gana mas placa, pero e ta un desgaste pabo tambe como persona.

Eventualmente e cansancio ta bay yega y e presion ta bay haci cu por ehempel ta bay tin mas empleado cu ta bay AO, segun Figaroa kende a bisa cu overtime mester ta un solucion cu no ta permanente.

El a splica cu pa un temporada por haci esaki, pero na termino largo bo no ta bay wante.

“Nos ta sintiendo cu nos ta yegando na un punto unda cu e trahadornan ta bisa cu nos no por mas cu esaki, apesar di e hecho cu financieramente e ta mihor pami”, segun e presidente di FTA.

Pesey mester haci algo riba e escases di trabao a corto plaso.

Figaro a indica cu recientemente el a reuni cu DIMAS y a trece algun sugerencia pa loke ta migracion, unda cu ta bay papia riba e fayonan den pasado y pa no ripiti esaki.

“Mester bin cu un maneho di migracion y no solamente un maneho di admision, pues mester atende cu tur cos rond di esaki manera por ehempel cu mester bin mas vivienda, mas transporte, mas cuido medico y mas educacion”.

Esaki ta cosnan mara cu e hecho cu bo poblacion ta bay crece y e ta necesario, segun Figaroa, kende a indica cu el a wak cifranan cu ta mustra cu na Aruba pa aña tin mas hende cu ta fayece, compara cu e hendenan cu ta nace.