Nominacion pa STREA Deportivo Aruba 2025 ta oficialmente habri

Minister Gerlien Croes

ORANJESTAD (AAN): Minister di Deporte, sra. mr. Gerlien Croes, ta anuncia cu e periodo di nominacion pa STREA Deportivo Aruba 2025 a habri oficialmente y lo ta habri te cu dia 5 di juli 2026.

Tur federacion deportivo cu ta cay bou di Comite Olimpico Arubano (COA) y/of Aruba Sport Unie (ASU) a ricibi comunicacion oficial via email y whatsapp, incluyendo acceso na nan cuenta digital riba e plataforma digital di STREA: www.streadeportivoaruba.com, unda cu nan por cuminsa registra nan nominacionnan pa atletanan cu a destaca durante aña deportivo 2025.

Minister Gerlien Croes ta encurasha tur federacion pa haci uzo di e sistema digital aki, cu ta facilita e proceso eficiente, moderno y completamente transparente pa seleccionamento di e nominado y eventual ganadornan.

“Nos ta invita tur federacion pa reconoce y honra e esfuerso, talento y dedicacion di nos atletanan cu a sobresali den aña 2025. E plataforma nobo ta duna nos e oportunidad pa haci esaki den un manera cla, transparente y accesibel pa tur hende”, asina Minister Gerlien Croes a enfatisa.

E rebranding di STREA Deportivo Aruba, anteriormente conoci como Premio Excelencia den Deporte, ta marca un paso importante den modernisacion di e evento deportivo mas grandi di Aruba. E iniciativa ta pa sigui mantene su mision principal: reconoce atletanan y dirigentenan deportivo cu ta contribui significativamente na desaroyo y resultadonan exitoso den deporte tanto local y internacional di nos atletanan local.

Durante e lansamento oficial, a pone enfasis riba e importancia di transparencia den e proceso di nominacion. Pa medio di e plataforma digital, no solamente federacionnan por registra nominacionnan, sino tambe publico por sigui e proceso di cerca.

Minister Gerlien Croes a expresa su gratitud na e comision organisatorio pa nan dedicacion y profesionalismo den organisacion di e evento, y tambe na partnernan clave IBiSA y Lotto pa Deporte pa nan sosten continuo.
“Sin e compromiso di nos partnernan, esaki no lo tabata posibel. Hunto nos ta sigui eleva e nivel di deporte na Aruba y duna e reconocemento mereci na nos talentonan locals,” a wordo añadi pa Minister Gerlien Croes.

STREA Deportivo Aruba ta simbolisa Superando Talento, Resaltando cu Esfuerso y Ambicion, reflehando e trayecto di cada atleta cu ta lucha pa logra exito den nan respectivo disciplina.

Ministerio di Deporte ta invita tur federacion pa inicia nan nominacionnan y ta anima henter comunidad deportivo pa sigui e proceso via e plataforma oficial.

-www.streadeportivoaruba.com-