Segun Hose Figaroa di Sindicato FTA:
ORANJESTAD (AAN): Hose Figaroa di Sindicato FTA, den un entrevista cu DIARIO ta indica e importancia di e Plataforma Educacion y Labor (PEL) pa e trahado local. Meta di PEL ta pa busca e conexion entre educacion y trabou.
Segun e, hopi biaha tin expresionnan den comunidad cu ta bisa cu mester duna localnan oportunidad prome cu stranheronan. Sinembargo, hopi biaha localnan ta haya oportunidad pa trabou, sea nan no tin interes of ta prepara pa e trabou y ta prefera pa bay traha afo. Esaki segun e, ta un resultado di e maneho di hopi aña unda cu no a guia e sistema di educaion bon.
Aruba ta un pais chikito sin un economia diversifica. Nos economia den su 80% ta directamente y indirectamente ta enfoca riba servicio, turismo. Y ta den e direccion aki mester prepara e comunidad hoben pe. Segun e, e oportunidadnan pa otro trabou na Aruba ta minimo.
El a reenforsa su opinion dunando algun ehempel entre otro, cu si Aruba produci 250 docter, lo no tin trabou pa nan na Aruba. El a enfatisa cu loke nos tin na Aruba ta turismo y nos mester guia nos hobennan mas den e direccion aki.
Segun e, pa hopi aña a pone un marca negativo riba e trabou den e sector turistico y e ambicion pa e trabou aki a baha. Sinembargo, el a menciona cu hopi hende ta gana bon salario den e sector aki.
“E trabou no ta malo solamente a haya un stigma negativo. Si bo kier pa bo localnan traha e trabounan cu bo tin pa ofrece, bo tin pa prepara nan debidamente pa nan conecta na loke cu tin”, el a enfatisa.
El a expresa cu e meta di e congreso recien di PEL, tawata pa duna informacion di esaki y haya idea y feedback di e shop stewards cu ta biba e situacion aki na pia di trabou unda cu e conexion hopi biaha no ta bay manera mester ta, specialmente den e sector hotelero. Motibo di esaki ta, cu e trahadonan aki no ta prepara debidamente pa e trabou den e sector aki. Segun e, den pasado a haci diferente intento pa drecha esaki, pero no a logra suficiente.
“Si nos kier bay den e direccion pa pone nos hobennan cu ta caba scol bay traha den e cuponan di trabou cu ta habri, nos mester prepara nan pa e cuponan di trabou cu ta habri, y no na esnan cu no tin of tin masha poco”, señor Figaroa a enfatisa.
Segun e, si no prepara bo localnan pa e cuponan di trabou cu tin disponibel, lo conduci cu lo bay importa hende pa haci e trabounan aki. Despues segun e, ta haya critica cu no ta duna localnan oportunidad. “Si e localnan no ta prepara pa e oportunidadnan aki, dificilmente por duna nan e oportunidad”, el a conclui bisando.
