Bario Mabon ta mira resultado positivo despues di Dia Nacional pa Cuida Aruba

ORANJESTAD (AAN): Bario Mabon ta disfrutando di un ambiente mas limpi y organiza despues di e exitoso Dia Nacional pa Cuida Aruba,

cu a tuma luga dia 25 di juli. E accion nacional a resulta den un cambio visibel den diferente area di e bario y a fortalece e sentido di colaboracion entre comunidad, sector priva y diferente partnernan.

   Durante e accion, diferente punto importante di Mabon a haya un limpiesa profundo, entre otro Parke Mabon, e areanan rond di e facilidadnan deportivo, e speeltuin central di e bario, e area rond di e trapi y diferente camindanan paden cu tabata mester atencion. Habitantenan tambe a haci bon uzo di e oportunidad pa deshaci di desperdicio cu tabata acumulando den nan cas y rond di nan propiedad.

   Presidente di Comision di Desaroyo y Bienestar Bario Mabon, Astrid Vries, a expresa su gran satisfaccion cu e resultado di e accion. Segun Vries, e reaccionnan cu e Comision a ricibi di habitantenan ta sumamente positivo y ta confirma cu e esfuerso conhunto a haci un diferencia real den e bario.

   Un di e cambionan cu mas a yama atencion ta e area rond di e trapi recientemente construi. Cu e mondi y vegetacion limpi, e infrastructura awor ta mas beneficioso y ta brinda un acceso mas sigur y agradabel pa habitantenan cu diariamente ta uza e ruta pa bay trabao, scol y otro diligencianan.

   E entusiasmo no ta limita solamente na e Comision. Mirna Kemp, habitante di Bario Mabon, tambe a expresa su satisfaccion cu e cambionan cu a tuma luga.

   Segun Mirna, e limpiesa ta representa un bon comienso pa e bario. El a enfatisa cu awor ta importante pa tur habitante contribui pa mantene Mabon limpi y evita tira desperdicio den luganan cu no ta designa pa haci tal. Na mes momento, e ta mira oportunidadnan pa sigui desaroya e facilidadnan deportivo y recreativo, pa asina crea mas actividad y mas bida den e comunidad.

   Comision di Desaroyo y Bienestar Bario Mabon a expresa nan sincero agradecimento na Alex Hozee, Oficial di Enlace pa Cooperacion Civil-Militar (CIMIC) di Marina Real Hulandes, y Comandante Henk Buijs di Marinierskazerne Savaneta, pa nan importante contribucion durante e accion.

   Un reconocemento special tambe expresa na Werkgeversvereniging Arubaanse Bouwnijverheid (WAB) y e companianan participante, Algemeen Bouwbedrijf ALBO Aruba N.V., Arubaanse Wegenbouw Maatschappij, CHS Technical Contracting & Trading Company N.V. y Bohama Aruba N.V. , cu a pone na disposicion personal, ekipo y makinaria, contribuyendo significativamente na e resultado final di e accion di limpiesa.

  Comision tambe a expresa su gratitud na Prome Minister Mike Eman, cu a duna inicio na Dia Nacional pa Cuida Aruba, un iniciativa cu a reuni gobierno, sector priva, boluntario y comunidad cu un meta comun: crea un Aruba mas limpi, mas bunita y mas sostenibel.

   Awor cu e accion a culmina cu exito, Astrid Vries ta enfatisa cu e siguiente reto ta den man di e comunidad. "Awor ta toca na nos como bario pa mantene nos bario limpi," el a expresa.

   Mientras tanto, Comision di Desaroyo y Bienestar Bario Mabon ta sigui traha riba e siguiente fase di desaroyo di e comunidad. Entre e plannan presenta na Gobierno, tin diferente iniciativa pa fortalece e facilidadnan deportivo, recreativo y comunitario, respondiendo directamente na e deseo di e habitantenan.

E vision ta cu Mabon no solamente keda un bario mas limpi, sino tambe un comunidad mas activo, atractivo y orguyoso di su entorno. E resultado di Dia Nacional pa Cuida Aruba ta confirma cu, ora gobierno, partnernan y comunidad uni nan forsa, cambio positivo y duradero ta bira posibel.