Gobierno tin te cu 5 di Augustus pa duna contesta encuanto preocupacion na Dept di LaborGobierno tin te cu 5 di Augustus pa duna contesta encuanto preocupacion na Dept di Labor

Segun Vilma Thijsen di TOPA:

ORANJESTAD (AAN): Sindicato TOPA ta preocupa pa e situacion den cual e funcionarionan di Departamento di Labor (DAO) a muda. Representante di TOPA, Vilma Thijsen, a declara cu e problema no ta nobo, sino cu desde 2019 e sindicato ta advirti diferente minister tocante e condicionnan di e edificio.

   Segun Thijsen, e trahadornan anteriormente tabata den un edificio cu problemanan serio di schimmel, pero awor nan a muda pa un otro edificio cu, segun nan, ta den un estado ainda peor. El a bisa cu TOPA a informa e minister actual cu e lugar nobo no ta adecua ni salud ni pa siguridad di e personal.

   Un di e preocupacionnan di mas grandi ta cu e edificio ta den mesun compleho cu un fabrica di ijs caminda ta uza amonia y otro productonan kimico, loke segun TOPA ta crea riesgo adicional den caso di un accidente of candela. Tambe, e edificio tin solamente un salida di emergencia, cu sindicato ta considera insuficiente pa e cantidad di personal cu mester traha aden.

   Ademas, e edificio ta presenta diferente problema di mantenimiento. Trahadornan a reporta vochting constante, schimmel den oficinanan, stoelnan cu ta haya schimmel despues di algun dia sin uzo, liek den e blafon y ekiponan di paga candela cu no ta actualisa. Segun TOPA, nan a documenta tur e iregularidadnan aki cu potretnan.

   Thijsen a agrega cu tambe tin problema cu cacacala y otro plaganan den e edificio, mientras cu, segun e, no a wordo fumiga prome cu mudamento. El a cuestiona con un departamento gubernamental por wordo muda sin cu a haci inspeccionnan previo pa determina si e edificio tabata apto.

   Siman pasa, TOPA a reuni cu e advisor di minister, señor Duineveld, pa presenta e evidencia y splica e preocupacionnan di e trahadornan. Segun e sindicato, e minister a wordo invita tambe pa bishita personalmente e edificio pa constata e condicionnan.

   TOPA a indica cu anteriormente a wordo informa cu Departamento di Progreso Laboral (DPL) tabata ocupa e edificio pa siete aña sin kehonan formal. Sin embargo, Thijsen a bisa cu hopi trahador di DPL tabata keda silencioso pa e sintimento di insiguridad kico lo pasa cu nan, describiendo e ambiente como un "cultura di miedo".

   E sindicato a duna e minister te dia 5 di augustus pa responde na e preocupacionnan presenta. Si no tin un solucion satisfactorio, TOPA lo sigui cu e siguiente paso. E sinidaco ta sostene cu lo sigui apoya e trahadornan, kendenan e biaha aki a tuma iniciativa pa nan mes y a manda carta na Brandweer, DTI y Ombudsman buscando intervencion. Segun Thijsen, e situacion actual no por sigui asina pasobra e salud y siguridad di e personal mester bira prioridad.