Parlamentario Eduard Pieters:
ORANJESTAD (AAN): Na cuminsamento di un aña escolar nobo, lider di fraccion di PPA, Eduard Pieters, a desea e muchanan, e mayornan y e maestronan hopi exito y perseverancia, pero inmediatamente a pone un preocupacion serio riba mesa: segun Pieters, Aruba ta invertiendo miyones di Florin den material educativo, cu ta diametralmente opuesto na e rumbo cu pais mes a scoge pa enseñansa multilingual. Pieters a cuminsa enfatisa e rol crucial di maestro.
“Boso ta arkitectonan di nos sociedad. E impacto cu un maestro tin riba bida di un mucha ta enorme. Nos mester percura pa no laga ningun mucha atras.”
Pero durante vakantie, segun Pieters, PPA a ricibi varios yamada di e maestronan y e cabesantenan, tanto di scolnan publico como di e scolnan Catolico, cu e preocupacionnan tocante e rumbo di enseñansa y particularmente con ta uza fondo publico.
Enseñansa multilingual, pero material na Hulandes: Pieters a recorda cu Aruba a scoge algun aña (2023) pasa pa move den direccion di enseñansa multilingual, teniendo cuenta cu idioma materno di e mucha. E proceso a cuminsa den klas 1 y a sigui progresivamente. Pero awo, segun Pieters, ta surgi un contradiccion fundamental.
Mientras e muchanan ta siñando lesa y skirbi na Papiamento, diferente directiva di scol, incluyendo e scolnan publico, ta invertiendo sumanan considerabel den material nobo di matematica na Hulandes.
“Bo no por laga un mucha siña lesa y skirbi na un idioma, pero despues oblig’e procesa matematica den un otro idioma. Unda e logica ta?” Pieters a compara Aruba cu e otro paisnan, unda enseñansa inicial di lesa, skirbi y matematica generalmente ta forma parti di un mesun contexto linguistico. Pa PPA, e problema no ta idioma Hulandes. E problema ta coherencia den maneho educativo.
“Esaki ta kapitaalvernietiging”: Pieters a cuestiona pakico e scolnan mester inverti di nobo den material Hulandes, mientras Aruba ya tin material desaroya pa duna matematica na Papiamento, esta Conta Cu Mi cu ta acopla na metanan nucleo di enseñansa basico di pais Aruba.
“Nos a inverti hopi placa di pagado di belasting pa desaroya e materialnan aki. Si awo nos laga nan un banda y bolbe gasta miyones na otro material, esaki ta kapitaalvernietiging.”
Segun e lider di fraccion, e costo por subi na aproximadamente 400.000 te 500.000 Florin pa scol, mientras e mesun fondo por wordo dirigi na e necesidadnan urgente.
Pieters a menciona infrastructura deteriora, banki y stoel, material moderno pa klas y e medionan digital cu e maestronan mester pa duna enseñansa di calidad.
Pieters a señala cu e mes a bishita EPB y a observa e necesidadnan grandi di infrastructura, mientras otro scol tambe ta lucha cu mantencion grandi y chikito.
Pa PPA, esey ta haci e pregunta ainda mas urgente: si fondo pa enseñansa ta limita, pakico gasta miyones reemplasando material, mientras e scolnan tin e necesidadnan basico sin resolve?
Pieters ta responsabilisa liderazgo politico: E critica mas fuerte di Pieters ta dirigi na liderazgo di Ministerio di Enseñansa. Segun Pieters, e problema no ta solamente un decision di compra. Ta falta di direccion consistente entre politica educativo, preparacion di e maestronan, material didactico y e inversionnan cu e directivanan di scol ta haci.
“Esaki ta falta di liderazgo. Bo no por anuncia un rumbo pa enseñansa y despues permiti e inversionnan cu ta bay diametralmente contra e mesun rumbo.”
Pieters ta sostene, cu si Aruba berdaderamente kier enseñansa multilingual, Gobierno mester crea e condicionnan pa haci esey exitosamente: prepara e maestronan, duna nan material adecuado y crea un transicion coherente di e otro idiomanan.
E mensahe di PPA na inicio di aña escolar, pues, ta dobel: confianza den e maestronan y e muchanan, pero un exigencia di asumi liderazgo politico directo na Gobierno. “Nos por pidi e maestronan duna su maximo y nos por pidi e muchanan haci nan best. Pero Gobierno tambe mester haci su parti. Enseñansa mester tin direccion, coherencia y liderazgo.”
