Problema di sushi y desperdicio ta hopi grandi na Aruba

Segun Director di Serlimar Michel Henriquez:

ORANJESTAD (AA): E problema di maneho di desperdicio na Aruba ta existi ya pa basta tempo. Segun Director di Serlimar Michel Henriquez, e problema ta grandi. Den un entrevista cu DIARIO el a duna di conoce cu ceramento di dumb tabata un problema. Aworaki cu recien a pone bakinan pa deposita sushi na Barcadera, ta yuda e situacion.

   El a enfatisa cu tin hopi necesidad pa tira sushi afo. Esaki por a comproba tambe den a accion nacional diasabra siman pasa. E cantidad di sushi cu a hiba tabata mas cu a spera. El a menciona cu na San Nicolas ya den e prome oranan di dia, e bakinan tabata yen. “Ta hopi sushi tin eyfo”, el a bisa.

   Awo mester bin cu maneho di solucion. Serlimar ta planiando campaña specialmente pa fin di aña y lo anuncia y lansa esaki pronto. Ta pensando pa bin cu un campaña di saco manera a haci hopi aña atras. E campaña ta dirigi na sushi di cas cu por bay den e saconan aki. No pa bloki of materialnan pisa.

   Na final, Henriquez a informa cu clientenan di Serlimar pronto lo por crea nan propio cuenta riba e website oficial di e empresa. Esaki lo permiti nan consulta nan estado di pago y uza diferente servicio online. Actualmente, e website ta ofrece varios servicio, manera solicita reemplaso di bari kibra, pidi bari adicional of elimina un bari, manera tambe reporta animalnan morto riba caminda.