E di tres edicion di San Nicolas Food Truck Festival ya tin fecha

Comunidad por bay disfruta y sostene nos hendenan

ORANJESTAD (AAN): Durante un conferencia di prensa oficial convoca na Kulture Kafe, comite organizador, hunto cu patrocinadornan, a presenta detaye di e tres edicion di San Nicolas Food Truck Festival. E evento familiar lo tuma luga Diasabra 1 di augustus 2026, di 6’or di atardi pa 11’or di anochi, den centro di San Nicolas. Entrada ta completamente gratis.

   Despues di a atrae mas cu 6.000 bishitante aña pasa, organizadornan ta prepara pa ricibi un publico ainda mas grandi durante e edicion aki. Pa un anochi, centro di San Nicolas lo transforma den un punto di encuentro yen di sabor, musica, cultura y alegria, reuniendo 25 food truck y bendedor, restaurantnan pop-up riba Promenade y varios comerciante y emprendedor local.

   Mas cu djis un festival gastronomico, e evento ta un invitacion pa pueblo sali, pasa tempo hunto y redescubri e ambiente unico di San Nicolas. Cada compra haci cerca un food truck, bendedo, artesano, restaurant of comercio den e area ta contribui directamente na fortalecemento di economia local y ta yuda crea mas oportunidad pa emprendedornan chikito.

   E tema di e aña aki ta “Island Species”, cu ta pone enfasis riba importancia di producto local y e rol di agricultornan den futuro di Aruba. Agricultornan local lo haya un plataforma pa presenta nan producto y servicio, mientras publico lo haya mas informacion tocante e beneficio di cumpra producto cultiva y produci localmente. Esaki no solamente ta sostene nos propio emprendedornan, sino tambe ta contribui na un Aruba mas autosuficiente y menos dependiente di importacion.

   Programa di e anochi ta inclui presentacion di bandanan local, DJ y gruponan di baile. Riba e podium principal lo tin un competencia di come hot dog, mientras e muchanan por disfruta di un area special cu Dino Jumps, face painting y actividadnan cu Hot Wheels. Tambe lo tin “kidpreneurs”: mucha cu nan propio iniciativa comercial, cu lo haya oportunidad pa ofrece nan productonan na publico.

   San Nicolas Food Truck Festival ta busca crea un experiencia pa henter famia, especialmente como un ultimo salida agradabel prome cu muchanan bolbe scol. Na mes momento, e evento ta duna food trucknan, bendedor, artesano, agricultor y hobennan emprendedor acceso na un publico grandi y diverso.

Comite organizador ta invita henter comunidad, tantonan local como bishitante, pa no solamente bini come y disfruta, sino pa tuma tempo pa cana den San Nicolas, conoce su comerciantenan y experimenta e calor humano y riqueza cultural cu ta caracteriza e ciudad.

   “Cada persona cu asisti ta bira parti di algo mas grandi. Ta trata di disfruta hunto, pero tambe di sostene nos hendenan, nos talento, nos producto local y e comunidad di San Nicolas. Ora nos cumpra local, nos placa ta keda circula den nos propio economia y nos tur ta beneficia.”

   Cu apoyo di su patrocinadornan y partnernan, en special Minister di Turismo, mr. Wendrick Cicilia, ademas di Frasa y Martijn Trading, San Nicolas Food Truck Festival kier sigui eleva perfil di San Nicolas como un destino cultural, gastronomico y comunitario. Tambe un danki na tur participante y boluntario.

E meta ta fortalece orguyo den e comunidad, stimula actividad economico y crea un espacio caminda residente y bishitante por encontra otro den un ambiente di unidad y solidaridad.

   San Nicolas Food Truck Festival lo tuma luga diasabra 1 di augustus, di 6’or di atardi pa 11’or di anochi, den centro di San Nicolas, cu e stage principal situa na e rotonde dilanti di Nicolaas Store. Entrada ta gratis.