Teniente-coronel di Marina Hulandes Henk Buijs a tuma oficialmente e mando di Marinierskazerne Savaneta

ORANJESTAD (AAN): Teniente-coronel di Marina Hulandes Henk Buijs a tuma oficialmente e mando di Marinierskazerne Savaneta na Aruba,

diaranson 8 di juli, relevando Teniente-coronel Tim van Wijk. E transferencia di mando a tuma lugar durante un ceremonia militar na Marinierskazerne Savaneta.

Ceremonia na Kazerne

E ceremonia tabata atendi pa Su Excelencia Gobernador di Aruba, Alfonso Boekhoudt, Prome Minister Mike Eman y Comandante Walter Hansen, Comandante di Forza Naval den Caribe di Reino Hulandes. Tambe tabatin presencia di representantenan di Gobierno di Aruba, Defensa, partnernan internacional, famia y otro invitado.

Cuater aña di colaboracion

Teniente-coronel di Marina Hulandes Tim van Wijk ta mira bek cu orguyo riba su cuater aña como comandante di e kazerne. Durante e periodo ey, Marinierskazerne Savaneta a sigui desaroya como base principal di Mariniers Squadron Carib y como un pieza importante pa e region. Bou di su liderato, e base militar no solamente a enfoca riba preparacion operacional y apoyo na unidadnan propio y bishitante, pero tambe a inverti activamente den fortalecemento di colaboracion cu Aruba y cu e paisnan den parti Caribense di Reino.

Van Wijk a expresa su gratitud y orguyo pa e colaboracion cu e personal y tur partnernan, cu den e ultimo cuater aña, a traha hunto pa fortifica siguridad den e parti Caribense di Reino.

Segun Van Wijk:"E fortaleza di Savaneta no ta basa solamente riba nos preparacion operacional, sino principalmente riba e personanan y e colaboracion cu nos a logra construi hunto."

Un fase nobo

Teniente-coronel di Marina Hulandes Henk Buijs lo enfoca riba sigui fortalece e preparacion operacional, amplia e colaboracion cu partnernan y prepara e unidad pa futuro operacionnan. E contribucion na siguridad y stabilidad den Caribe lo sigui ta e prioridad principal.

Segun Buijs: "Nos ta cla pa responde ora Reino haci un apelacion riba nos, hunto cu nos partnernan di siguridad. Na mesun momento, nos ta sigui prepara pa e desafionan di mañan."