Den apenas un aña ya caba Iberostar Aruba a crea impacto positivo riba e isla

Nan ta envolvi den asina hopi den medio ambiente

• Tur trahador a haya training y sa tur cos di turismo sostenibel 

ORANJESTAD (AAN): Recientemente, DIARIO tabata presente na momento cu Iberostar Hotels & Resorts cu orguyo a celebra e prome aniversario di JOIA Aruba by Iberostar. Durante e ultimo aña, e compania a solidifica su presencia riba e isla pa medio di un modelo di turismo responsabel, enfocando riba iniciativanan ambiental di impacto halto, desaroyo social, y aliansanan local cu balor.

   Pa esnan cu no sa, Iberostar Hotels & Resorts ya ta existi na mundo pa 70 aña caba, dunando respaldo rond di e planeta pa su Turismo cu Proposito.

   Cu 100 propiedad den 14 pais y siete decada di experiencia den e industria, Iberostar ta sigui boga pa cambio positivo pa medio di turismo positivo. Como un negoshi 100% familiar, e compania ta wordo guia pa un vision robusto a largo plaso, cu enfoke riba duna balor di calidad halto y transforma e sector turistico den un forsa regenerativo cu ta cuida ecosistemanan (specialmente nos lama) y ta contribui na e bienestar di e comunidadnan unda nan ta opera.

   Iberostar ta avansando su strategia di turismo responsabel pa medio di su movemento ‘Iberostar Wave of Change’, structura rond di siete area di enfoke: (1) Cuido di nos hendenan.  (2) Compromiso cu comunidadnan local. (3) Proteccion di naturalesa. (4) Promocion di consumo responsabel di producto di lama (5) Accion climatico. (6) Experiencia circular. (7) Crecemento responsabel.

   Cu mas di 460 profesional trahando na Iberostar Aruba y e compromiso pa traha aliansanan a largo plaso, e compania ta implementa su modelo di turismo responsabel na Aruba pa medio di JOIA Aruba by Iberostar y e campo di golf di Tierra del Sol.

   “Nos a diseña JOIA Aruba by Iberostar pa e ta un luga di encuentro pa nos hendenan local, y nos ta orguyoso di habri nos portanan y nos experiencianan unico pa e comunidad. Nos ta balora profundamente nos colaboracion cu e comunidad di Aruba y nos ta orguyoso di introduci Iberostar su modelo di turismo responsabel como un forsa pa cambio positivo. E milestone aki ta reforsa nos compromiso pa construi aliansanan local mientrastanto nos ta proteha e medio ambiente cu ta rondona nos”, ta loke Arnaud Le Lanchon, General Manager di Iberostar na Aruba, a declara.

   Prioridad di JOIA Aruba: Desde su apertura, JOIA Aruba by Iberostar a prioritisa un cultura unda e ser humano ta central. E resort a bira un motor clave pa desaroyo di e forsa laboral local pa medio di pasantianan den colaboracion cu Colegio EPI, EPB School, y Universidad di Aruba, brindando mas di 40 studiante experiencia den hospitalidad.

   Un pilar di su compromiso cu comunidad ta e programa Aula di Lama; un espacio educativo habri dedica na nos lama. Den su prome aña, e programa a fungi como anfitrion pa 145 sesion, alcansando aproximadamente 1,290 beneficiarionan, inspirando un generacion nobo di protector di lama pa medio di colaboracion cu mas di 15 NGO local. E aliansanan aki ta esencial pa garantisa cu e contenido ta keda relevante, basa riba ciencia, y conecta cu prioridadnan ambiental actual.

   Ademas di educacion, Iberostar a construi relacionnan significante cu varios socio local, incluyendo Metabolic Foundation, Fundacion Savaneta, Alto Vista Winery, y Cunucu Libiee, apoyando cultura local, desaroyo comunitario, y experiencianan Arubiano autentico cu ta conecta bishitante cu e tradicionnan di e isla.

   Pa medio di su aliansa cu Alto Vista Winery, Iberostar hunto cu varios otro hotel ta apoya un enfoke circular pa maneho di desperdicio. Desperdicio di cuminda di e sector di hospitalidad ta wordo procesa na un manera responsabel y transforma den un nutrient-rich compost, cual ta yuda nutri e agricultura local y ta contribui na practicanan di agricultura mas sostenibel riba e isla.

   Ademas, e compania a lansa e Shoco Boulevard na JOIA Aruba by Iberostar, un luga educativo riba e propiedad dedica na crea conciencia tocante e specienan y e biodiversidad unico di Aruba. Mas di 1000 participante, incluyendo miembronan di e ekipo di JOIA Aruba, stakeholders di comunidad, studiantenan di Universidad di Aruba, empleadonan di otro hotel nan, y prensa local, a completa e entrenamiento di Shoco Ambassador, fortaleciendo e conciencia di conservacion y conocemento tocante Aruba su shoco. JOIA Aruba tambe a wordo selecta pa fungi como anfitrion pa e World Owl Conference na 2026, locual ta confirma nan papel pionero den educacion ambiental y preservacion di bida salvahe.

   Jareth Vermeulen, Destination Alliances Manager pa Aruba, ta splica: “Nos ta balora profundamente nos colaboracion cu e comunidad di Aruba y nos ta orguyoso di introduci Iberostar su modelo di turismo responsabel na Aruba como un motor activo di cambio positivo. E etapa aki ta reforsa nos compromiso pa fomenta aliansanan local fuerte pa logra nos meta di salvaguardia e naturalesa cu ta rondona nos propiedadnan”.