Chauffeur burachi ocasiona accident cu basta daño material na Solito

ORANJESTAD (AAN): Diaranson anochi den careda di 11:00 pm a drenta informacion na Polis cu riba caminda di Playa pa Tanki Leendert tin un accident fuerte den area di Solito.

   Informacionnan cu a drenta a papia di hende herida, pero e prome unidad di Polis di Playa cu a yega, a tuma nota cu afortunadamente no tabatin ningun hende herida.

   Papiando cu esnan envolvi, a nota cu e chauffeur di un Toyota Yaris ta mustra di tin caracteristica cu e lo por ta bao influencia.  Esaki a nota debi cu e tabata papia cu lenga pisa, su wowo ta basta cora, y mucho mas.

   A pidi su cooperacion pa haci test di supla riba e aparato di AlcoSensor, y e resultado a sali malo p’e, indicando cu el a sobrepasa e limite legal di Aruba.  Automaticamente mesora a pone boei na su mannan ya cu el a keda deteni.

   Loke a socede ta cu  e chauffeur di e Toyota Yaris color berde benta a yega e T-weg net pazuid di e Sub-Station di Elmar, pero a gewoon sigui core y dal contra un SUV Hyundai Santa Fe color shinishi pasando.

   Ta keda demostra aki cu keto bay tin cierto chauffeur cu no ta importa cu nan ta subi core auto bao influencia y cu tur e consecuencianan negativo cu esaki ta trece cu ne.  Hopi biaha Aseguro no ta paga pa e dañonan aki, y abo mes tin di bay kraak bo cartera pa paga tur cos.  Y kizas ricibi un nota riba bo carchi di bon conducta tambe pasobra a core burachi.