Situacion na AWSS ta hole stinki y tin inversion di 10 miyon Euro tira un banda sin splicacion

Parlamentario Hendrik Tevreden:

ORANJESTAD (AAN): Parlamentario Hendrik Tevreden a bati e alarma bisando cu e situacion di e ‘afvalwaterbedrijf’ AWSS ta hole. Tevreden a señala cu esaki no ta solamente pa e awa stinki, sino tambe pa e mal maneho y e perdida enorme di capital den e empresa estatal aki. E situacion preocupante aki a hiba e parlamentario na lansa preguntanan formal na Minister di Energia, sr. Arthur Dowers, exigiendo transparencia total riba e maneho di e planta.

   Recientemente, profesionalnan di AWSS mes a confirma den Parlamento cu tin por lo menos 10 miyon Euro na makinaria di e compania Oblyses cu a wordo saca for di servicio sin un hustificacion concreto. Tevreden a pone enfasis riba e echo cu, te cu awe, Parlamento no a ricibi niun rapport cu ta indica e rasonnan pakico a saca e makinarianan aki for di funcion y tampoco no tin claridad riba kico lo ta e destino final of e futuro di e inversion miyonario aki. E Parlamentario a resalta cu ni e Minister mes a ricibi dicho rapport, locual ta confirma un falta total di transparencia riba un decision cu tin un balor financiero basta halto pa nos pais.

    Defecto tecnico of mal maneho: Pa Tevreden, e pregunta central ta simpel pero doloroso: Con por ta posibel cu un inversion di e magnitud aki ta wordo saca for di servicio sin un splicacion debido? Loke ta mas preocupante ta e falta di claridad:  (*) Defecto tecnico? - A cumpra algo cu no ta funciona? (*) Tecnologia cu no ta cuadra? - A inverti miyones den algo cu no ta apto pa Aruba? (*) Falta di training? - E personal no a wordo capacita pa opera e makinaria?

   Si e ultimo aki ta e caso, Tevreden ta adverti cu esaki no ta djis un mal preparacion, sino un fayo structural den e plan di inversion y maneho di e Ministerio.   (*) Modernisacion riba papel, holo stinki riba caya.

   Tevreden ta señala cu Gobierno ta “boca yen” pa papia di modernisacion y durabilidad, pero e realidad riba caya ta conta un storia totalmente diferente. Inversionnan di miyones ta keda tira un banda sin wordo uza adecuadamente, mientras cu e holo stinki ta keda persisti den e zona hotelero y awor a cuminsa afecta Parkietenbos tambe.

   Loke ta mas preocupante ta e falta di vision: awo Gobierno kier busca mas placa pa muda AWSS pa Parkietenbos, a pesar cu tur rapport ta splica claramente cu esaki no ta necesario. Pa e Parlamerntario, esaki ta un fayo structural den maneho: kier sigui gasta placa di pueblo den proyectonan sin base, mientras e problemanan real cu ta afecta comunidad ta keda sin wordo resolvi.

    Parlamentario Tevreden ta señala cu Minister di Energia, Arthur Dowers, ta e principal responsabel pa e situacion actual y diamars awor e tin e obligacion di duna cara den Parlamento atrobe. Ta inaceptabel cu ta tuma decisionnan di e magnitud aki sin presenta un rapport cu ta fundamenta e rason real tras di e maneho of decisionan aki. Pa Tevreden, ta un wega politico tin, pa keda punta dede y djey laga e debe pa pueblo paga. Den e cuadro aki, e cuestionamento ta bay tambe pa e papel di e coalicion: Coleganan den coalicion ta controlando gobierno of ta laga gol bashi sin keeper?

   E decisionnan aki no solamente ta perhudica esunnan cu ta sufri diariamente cu e mal holo di AWSS, e daño na medio ambiente of nos turistanan. Pero tambe e confianza di e cuidadanonan cu ta anhela y merece un bon gobernacion.

   Falta di control y vision: “Desde oposicion, nos posicion ta keda firme: e situacion actual ta refleha un falta total di control di parti di Minister Dowers. Su ministerionan ta demasiado grandi y tin un falta serio di vision y direccion.”

   Pa Tevreden, esaki ta un caso cla di un mandatario cu tin "demasiado hooi riba su vork", caminda e responsabilidadnan a sobrepasa su capacidad di maneho. E prueba mas contundente di e fayo di maneho aki ta e liheresa cu cual decisionnan financiero cu un impacto asina grandi ta wordo tuma: “Si facil asina ta saca 10 miyon euro na makinaria for di funcion, nos no tin un problema tecnico, nos tin un problema di gobernacion,” Tevreden a conclui.