Un dia exitoso cu Open Dag di Marinierskazerne na Savaneta

ORANJESTAD (AAN): Un biaha mas, Marinierskazerne Savaneta a luci na forma magistral cu nan tradicional ‘Open Dag’ riba Dia di Obrero.

   Aunke solo tabata extra fuerte cu minimo di nubia pa trece tiki sombra, toch e cantidad di hendenan cu a acudi tabata inmenso.  Tur hende, incluyendo muchanan a haya tur aspecto militar pa mira, y tambe observa e operacion di Wardacosta di Caribe Hulandes.

   Por a bay core riba trucknan militar, esnan yama ‘Anaconda’, tambe core riba Super Rhib di Wardacosta, y coremento door di obstaculonan pa muchanan.  Rij largo di hende pa subi e cutter Panter di Wardacosta.  A mira Bomberonan tambe ta haci demostracion di nan habilidad, y di nan vehiculonan, entre otro nan Hoogwerker.

   Como cu tabata hopi calor, por a mira con Mariniers tabata yuda tur bishitante haya awa pa bebe pa asina nan keda hidrata henter e dia.

   Tabatin vlooienmarkt, area di autonan clasico, demostracion di tur tipo, y tambe cuminda na benta.  Publico a descubri un fenomenal Beach Bar tambe cu tabata bon comenta.