Delincuencia hubenil ta un menaza structural pa cohesion social y pa futuro di nos pais

Investigacion di criminologo Henk Ferwerda ta mustra:

ORANJESTAD (AAN): E siman aki, investigador y criminologo Henk Ferwerda e presenta e resultado di “Bao sombra di Aruba. Tocante delincuencia hubenil, vulnerabilidad y resistencia den un comunidad isleño” durante un simposio mini na Universidad di Aruba. E investigacion aki, realisa pa Bureau Beke di Hulanda riba peticion di Procurador-General di Aruba, ta duna un vista impactante di e situacion di hobennan Arubiano.  

  Segun dr. Ferwerda, Aruba ta para net riba un crusada entre ambicion y limitacion. Delincuencia hubenil na Aruba no ta riba gran escala ainda, pero e casonan existente ta wordo caracterisa principalmente pa violencia y delitonan di droga. Ta pa e motibo aki mes cu e casonan ta forma un menaza structural pa cohesion social y pa futuro di nos isla.

   E yabi pa e solucion ta: inverti den hubentud. door di mara enseñansa, trabao, cuido y siguridad fuertemente na otro, Aruba ta na tempo pa kibra e circulo vicioso di criminalidad cu dia pa dia ta birando mas duro, y pa forma un generacion resiliente di hobennan.

   Criminologo Ferwerda a enfatisa cu e “parti scur” di Aruba cu e ta menciona den su investigacion no ta djis un metafora of un figura di palabra, sino un realidad social: un conhunto di barionan vulnerabel, famianan vulnerabel y hobennan vulnerabel cu ta biba den sombra di progreso turistico. Den e ambiente ey, pobreza, drop-outs, famianan kibra y oportunidadnan limita ta bin hunto.

   Pa garantisa futuro di Aruba, mester wak y reconoce e “sombra”. Pasobra ta solamente door di trece atencion pa e parti scur di Aruba, cu e parti bunita y prospero lo por sigui existi den e añanan nos dilanti.

   E resultadonan di e investigacion ta den un buki, cu tur hende por lesa y download gratuitamente riba e website di Ministerio Publico: www.omaruba.com.