Minister Dowers ta reuni cu operadornan di tour

Barancanan poni como obstaculo den diferente parti di e costa noord a causa preocupacion serio den e sector

ORANJESTAD (AAN): Minister di Husticia, Integridad, Transporte Publico y Energia, mr. drs. Arthur Dowers, a reuni cu un grupo grandi di companianan di tour pa scucha directamente for di nan, nan preocupacionnan y analisa hunto e situacion cu a surgi na costa noord di Aruba.

E reunion a tuma luga despues cu algun siman atras, varios operado di tour a topa barancanan poni como obstaculo den diferente parti di e costa noord. E situacion aki a causa preocupacion serio y incertidumbre den e sector, ya cu esaki por tin impacto riba nan operacionnan diario y e experencia di bishitantenan.

Durante e reunion, representantenan di e companianan di tour a haya oportunidad pa comparti nan preocupacionnan y sugerencia, mientras cu Minister Dowers y Departamento di Transporte Publico (DTP) a scucha cuidadosamente e diferente puntonan presenta.

E reunion a bay den un ambiente constructivo y respetuoso, unda tur partido a expresa nan compromiso pa sigui traha hunto na solucionnan cu ta den interes di Aruba.

Como resultado di e encuentro, a conclui cu ta importante pa crea un balansa entre limita molester, mantene orden publico y garantisa siguridad den areanan publico, sin perde di bista e importancia di sector di tour y e contribucion cu e ta haci na economia di nos pais.

Minister Dowers a gradici e representantenan di e companianan di tour pa nan disposicion y cooperacion, enfatisando cu un dialogo continuo entre gobierno y e sector priva ta esencial pa logra solucionnan sostenibel cu beneficia tanto comunidad como bishitantenan.