Rapport di calidad di aire na DIMAS a keda cla

Minister Dowers

ORANJESTAD (AAN): Recientemente, Minister di Husticia, mr. drs. Arthur Dowers, responsabel pa e maneho di admision di stranhero, a ricibi e rapport cu resultado di e investigacion haci den edificio di DIMAS, despues di e situacion cu a presenta algun siman pasa relaciona cu holo y posibel presencia di schimmel.

E investigacion a inicia despues cu varios empleado a bira malo riba mesun dia durante oranan di trabao despues cu a haya un holor fuerte di gas. Mirando e seriedad di e situacion y pa garantisa bienestar y siguridad tanto di empleadonan como clientenan di DIMAS, autoridad a dicidi pa evacua e edificio inmediatamente, pendiente un investigacion mas amplio.

Durante e dianan cu a sigui, Departamento di Salud Publico y e compania PURE Indoor Air Quality Solutions, a realisa diferente test y inspeccion den tur piso di e edificio. Entre otro, a tuma muestra pa determina posibel presencia di schimmel, a midi calidad di aire y a haci inspeccion tecnico di e sistema central di airco.

E rapport entrega na Minister Dowers ta indica cu e resultadonan di e investigacion ta cay denter di normanan normal. Esaki ta significa cu, basa riba e resultadonan, no tin indicacion cu ta existi un situacion cu ta representa un riesgo pa e empleadonan cu ta traha den e edificio ni pa e clientenan cu ta bishita DIMAS.

Minister Dowers a indica cu e resultado ta importante pa por duna tanto personal como publico e trankilidad necesario. Na mes momento, e mandatario a enfatisa cu e recomendacionnan inclui den e rapport lo haya e atencion necesario.

E rapport ta inclui algun recomendacion pa mehora ventilacion y circulacion di aire den e edificio. Minister Dowers a indica cu esakinan mester atencion, specialmente mirando cu varios edificio di Gobierno tin sistemanan cu ya tin varios aña den uzo y cu gradualmente mester modernisa pa sistemanan mas moderno y eficiente.