Estudio haci na 2022 a revela cu mas di 20% di rifnan di Aruba a desaparece durante 2002 y 2022

Christie Mettes di Metabolic Foundation:

ORANJESTAD (AAN): Christie Mettes di Metabolic Foundation a destaca e importancia vital cu rifnan tin pa Aruba, durante un entrevista cu DIARIO. Segun Mettes, rifnan ta forma un barera natural cu ta yuda proteha e costa di nos isla contra e efecto di cambio climatico, manera subida di nivel di lama, y tambe ta reduci e forsa di olanan durante tormenta y horcan.

   Mettes a splica cu na 2022, Metabolic Foundation a conduci un estudio comparando e estado di rifnan entre 2002 y 2022. E investigacion a revela cu mas di 20% di rifnan di Aruba a desaparece durante e periodo di 20 aña. Pa obtene un panorama mas actual, e fundacion posteriormente a analisa datonan di satelite pa monitorea e cambionan reciente den e ecosistema marino.

   Segun e resultadonan, varios rif, specialmente den e harbour area y den parti di San Nicolas, ta sigui deteriora y desaparece. E formacion di rif na Indian Head tambe ta reduciendo di tamaño na un ritmo relativamente rapido.

   Apesar di e desaroyo preocupante aki, Mettes a indica cu tin tambe ehempelnan positivo. E estudio cu ta cubri e periodo 2002–2022 a demostra cu e rifnan na Isla di Oro a registra un crecimiento constante. E tendencia positivo ey a sigui durante e periodo 2022–2026, hunto cu dos otro rif den e mesun area.

   Segun Mettes, esaki ta confirma cu rifnan tin capacidad di recuperacion y crecemento, semper cu nan haya e condicionnan adecua. El a menciona cu factornan manera espacio suficiente, poco disturbio humano, bon calidad di awa y un conexion saludable cu e mangelnan ta esencial pa un ecosistema marino resiliente.

   Ademas di sirbi como proteccion natural contra olanan grandi durante tormenta, nan ta fuente di santo blanco cu ta importante pa nos identidad como un isla turistico.

"Rifnan ta hopi importante pa nos isla, pa pesca, culturalmente, economicamente y structuralmente," Mettes a enfatisa.