The content originally appeared on:
Diario
Fabuloso ‘Incentive Trip’ di compania Mericano
Diferente instancia y compania local a join tambe
ORANJESTAD (AAN): Diasabra henter dia, por a nota cu algo grandi tabata pasando na Centro di Bario Lago Heights. A mira presencia di e.o. Ministro Rocco Tjon, como tambe Daniel Tecklenborg di CEDE Aruba, y a mira presencia di Sanju Luidens tambe di Aruba Tourism Authority.
Loke a socede ta cu CB Lago Heights a caba di ricibi un patrocinador principal, cu ta e compania Mericano ‘Edmentum’, y nan a bin Aruba pa asina participa henter dia na un proyecto bunita.
Entre esnan presente tabata e CEO di Edmentum cu tambe tabata presente. E compania a suministra fondo pa yuda trece cambionan positivo pa Centro di Bario Lago Heights, incluyendo un Cancha di Basketball di mitar tamaño, tambe un Hardin di Hunga cu su cura rond di dje, un Mini-Bike Park, un area pa Rollerskate, un sala adecua pa Bijles, lesnan di Arte cu un biblioteca chikito aden full aireacondiciona.
Ademas di esey, cu yudansa di diferente patrocinador, a logra traha tambe riba mantenimento di e Centro mes, y por a mira cu e lugar aki ta cuminsa haya un makeover tan mereci.
E proyecto di Edmentum ta dedica na comunidad di Sero Colorado, Lago Heights, Esso Heights, De Vuyst, Kustbatterij, Nijhoffstraat, Essoville, Yuwana Morto, y vecindario.
Ministro Rocco Tjon a felicita tur stakeholders cu a duna un man, incluyendo ATA, CEDE Aruba, y demas instancianan local, y principalmente e compania Edmentum. El a splica cu Edmentum ta un compania internacional cu ta un empresa renombra riba tereno di enseñansa, cu ta tuma nan responsabilidad social sumamente na serio, y nan a escoge Aruba pa bin duna un man, y nan mes a escoge Centro di Bario Lago Heights como nan punto focal. A ricibi extra yudansa di companianan local tambe cu a duna un man.
Cu e renobacion di lokaalnan, segun Ministro Tjon, no por djis duna les di arte so, sino por bay duna les di computer tambe na hobennan.
Tjon a indica cu di aña 2022 caba, Gobierno a bin cu e programa ‘Veilige Barios’ y di comienso caba nan a dicidi cu no ta haci esaki nan so, y kier pa e ta un proyecto duradero. Pesey a coopera cu CEDE Aruba, y ya caba diferente Centronan di Bario por mira e balor agrega di e cooperacion aki, unda mas fondo ta wordo aloca, y mas programa y actividad pa hobennan ta ser inclui, y na final di dia tin un proceso administrativo cu ta hacie mas facil pa Centronan di Bario por opera, y pa asina haci cambio productivo den bida di hobennan pa asina nan ta menos riba caya.
Sanju Luidens di ATA a indica cu nan ta admira e compania Edmentum cu a bin Aruba como nan ‘Incentive Trip”. Esaki nifica un compania ta duna su trahadornan un biahe como incentivo, y e biaha aki a bin Aruba. A escoge un proyecto unda nan por duna bek na comunidad di Aruba, como nan Proyecto CSR (Corporate Social Responsibility).
ATA y Aruba Convention Bureau a tuma e chens pa partner cu nan, pa asina por duna bek tambe na comunidad. Asina por mira cu companianan ta bin Aruba, y no ta djis goza di e isla, pero ta bin y conecta turismo cu comunidad y duna bek tambe.
Daniel Tecklenborg di CEDE Aruba a splica cu Edmentum a bin Aruba cu un grupo di 90 empleado Mericano kendenan a sobresali den benta, y nan deseo ta pa haci un “impacto den comunidad” cu un proyecto local. For di December 2023 caba nan a acerca CEDE Aruba pa asina check ideanan di loke nan por bin haci, y a duna nan diferente opcion. Nan a escoge pa CB Lago Heights por mehora su facilidad, y asina duna hobennan mas chens.
