Minister di Educacion ta desea hopi exito na tur cu e aña escolar 2026-2027

 “Educacion, formando nos futuro generacion”

ORANJESTAD (AAN):  Cu inicio di e aña escolar nobo 2026-2027, Ministerio di Educacion ta extende un caluroso saludo y e miho deseonan na tur alumno, studiante, maestro, docente, directiva di scol, personal administrativo y di apoyo, y mayornan rond di nos isla. Un aña escolar nobo ta representa un pagina blanco yen di oportunidad, reto y posibilidadnan nobo pa crece, siña y supera tur limite. 

Na nos alumno- y studiantenan: boso ta e curason di nos scolnan y e speransa di nos pais. Cuminsa e aña aki cu un mente habri, curiosidad y determinacion. Lo tin dianan yen di alegria y dianan cu ta exigi mas esfuerso, pero corda cu tur reto ta un oportunidad pa fortalece boso caracter. Cu perseverancia, disciplina y fe den boso mes, no tin ningun meta cu boso no por alcansa. Cada les cu boso siña awe ta un paso mas serca di boso soñonan mañan. 

Na nos educadornan y personal di scol: boso labor ta e motor cu ta impulsa nos sociedad. Boso no solamente ta transmiti conocemento, sino cu boso ta forma e lidernan, innovadornan y ciudadanonan di mañan. Boso pasion, pasenshi y dedicacion incondicional ta e fundeshi riba cua e futuro di Aruba ta wordo construi. Masha danki pa boso compromiso incansabel cu e formacion di nos hubentud. 

Na e mayornan y famianan: boso apoyo na cas ta e pilar mas fuerte den e biahe aki. E alianza entre cas y scol ta fundamental pa e exito y bienestar emocional di nos muchanan y hobennan. Sigui ta e prome fuente di animo, guia y amor pa boso yiunan. 

Educacion ta e yabi mas poderoso pa habri e portanan di futuro y sigura e progreso di nos pais. Minister Gerlien Croes como Minister di Educacion ta desea henter e comunidad educativo un aña escolar 2026-2027 yena cu sabiduria, salud, perseverancia y hopi exito.