Tercer edicion di “In the Picture” ta inicia cu 20 participante nobo

Jalken Antonia di Fundacion Ja Ik Aruba:

 “Cambio di mindset ta clave pa logra exito laboral” 

ORANJESTAD (AAN): Fundador di Fundacion Ja Ik Aruba y creador di e trayecto ‘In the Picture’,  Jalken Antonia, ta mira cu satisfaccion riba e comienso di e tercer edicion di e programa obligatorio destina pa clientenan di DAS cu ta ricibi sosten financiero (bijstand). 

Den e edicion aki, 20 participante nobo a cuminsa cu e trayecto, cu tin como meta pa prepara nan miho pa drenta mercado laboral, aumenta nan motivacion y fortalece nan actitud pa logra nan metanan personal y profesional. 

Dialuna e programa a cuminsa na unda cu e participantenan a haya un sesion introductorio, durante cual nan a ricibi informacion tocante e contenido y structura di e programa, y loke nan por spera durante e trayecto. Antonia a splica con e diferente partinan di e programa ta conecta cu otro y cua beneficioe participantenan por saca for di nan participacion. 

Segun Antonia, e participantenan ta ricibi coaching tres biaha pa siman y, como parti di e programa, nan ta bishita diferente compania pa conoce e mercado laboral mas di cerca. Sinembargo, un di e pilarnan principal di In the Picture ta e trabou riba e mindset di cada participante. 

E meta no ta solamente pa yuda nan haya un trabou, sino pa cambia e manera cu nan ta mira nan mes, nan posibilidadnan y nan futuro. 

Antonia ta considera e programa uno exitoso y a referi na e grupo anterior, cu a finalisa e trayecto na juni ultimo. Di e 32 participante, 12 a logra haya trabou, representando un 37.5%. Segun Antonia, esaki ta un resultado alentador cu ta refleha tanto e esfuerso como e potencial di e participantenan. 

El a enfatisa cu, ora un participante ta realmente dispuesto pa haci un cambio den su bida y ta compromete su mes cu e proceso, tin bon oportunidad pa logra integra den mercado laboral y haya un empleo cu perspectiva. Ademas, tin participantenan cu a bay un stap mas leu y a cuminsa explora of hasta lanta nan mesun negoshi. 

Segun Antonia, e resultadonan aki ta mustra cu actitud, perseverancia y un mindset enfoca riba crecemento ta fundamental pa logra exito. In the Picture no ta enfoca solamente riba haya trabou, sino tambe riba duna e participantenan e hermentnan y confiansa necesario pa construi un futuro mas independiente y logra cosnan grandi den nan bida.