Banco Central a mantene reserva obligatorio pa banconan comercial na 12,5 porciento

Desde 1 di September 2026...

ORANJESTAD (AAN): Banco Central di Aruba (BCA) a dicidi durante e reunion di e Comite di Maneho Monetario  riba 26 di augustus 2026 pa mantene e tasa di reserva obligatorio pa banconan comercial na 12,5% entrante 1 di september 2026.

   Puntonan principal:

   (1) Reservanan adecua: Te cu 24 di juli 2026, reservanan di divisa a sobrepasa substancialmente e normanan cu BCA ta monitoria. Ademas, BCA ta anticipa cu e reservanan di divisa lo keda adecua durante 2026.

  (2) Inflacion creciente: Ambos indicador di inflacion midi na final di luna contra e mesun luna di e aña anterior y e promedio anual di inflacion a registra nivelnan di 2,4% y 0,5% respectivamente na juni 2026.

  (3) Incertidumbre mundial economico: E incertidumbre mundial, incluyendo e tensionnan geopolitico persistente, por impacta e reservanan di divisa y inflacion, cu por causa desviacionnan for di e proyeccionnan cu ta fungi como punto di salida (“baseline”).

  BCA ta monitoria indicadornan monetario y economico di cerca y lo ahusta su posicion di maneho monetario ora ta necesario pa mantene e tasa fiho di e Florin na e Dollar Mericano.