Centro di Bario Playa Pabou lo funciona como un di e puntonan di colecta pa comunidad

Cuida Aruba

ORANJESTAD (AAN): Gobierno di Aruba, hunto cu CEDE Aruba y diferente partnernan, a brinda mas informacion tocante e proximo edicion di Cuida Aruba, cu lo tuma luga diabierna y diasabra awor.  E rueda di prensa a tuma luga na Centro di Bario Playa Pabou, cu pa e edicion aki lo forma parti di e puntonan di colecta pa comunidad.

Presente tabata Prome Minister Mike Eman, Coordinador di CEDE Aruba Silvhyanne Vrolijk, parlamentario pa Fraccion AVP Stephany Sevinger, vocero suplente di Bureau City Inspector Maurits Dijkhoff, Presidente di Centro di Bario Playa Pabou Kenneth Simons, vocero di DNM Shahayra Croes y Win Werleman, Hefe di Departamento di colecta sushi na Serlimar.

Prome Minister Mike Eman a indica cu Cuida Aruba ta sigui desaroya no solamente como un accion pa colecta sushi, pero como un esfuerso comunitario caminda organisacionnan, boluntarionan y habitantenan por tuma responsabilidad pa nan propio bario. Cu incorporacion di CEDE Aruba, e iniciativa ta haya un dimension adicional pa conecta cu NGO-nan y e gruponan cu kier adopta y cuida un area specifico.

Durante e rueda di prensa a destaca tambe e importancia di mira diferente tipo di desperdicio como material cu ainda por tin balor. Resto di mata y blachi, carton, papel, hero y otro material por forma parti di un proceso di separacion of reciclahe, en bes di termina simplemente como sushi.

Pa e edicion aki, Centro di Bario Playa Pabou lo funciona como un di e puntonan di colecta. E bakinan cu normalmente ta wordo coloca na Harbor Arena lo ta situa na Playa Pabou, ya cu Harbor Arena no ta disponibel pa motibo di un actividad grandi cu lo tuma luga e fin di siman. APA ta sigui como partner y patrocinador di e bakinan.

Coordinador di CEDE Aruba, Silvhyanne Vrolijk, a destaca cu interes pa participa den Cuida Aruba ta sigui crece. Diferente organisacion, empresa y scol a registra pa aporta, mientras cu gruponan di comunidad ta tuma iniciativa pa limpia of adopta areanan den nan propio bario. Entre otro, Centro Familia Piedra Plat a indica cu lo tuma responsabilidad pa diferente area den Piedra Plat, mientras cu Centro di Bario Playa Pabou tambe ta mobilisa habitantenan di su bario.

Vrolijk a invita organisacionnan y personanan cu ainda kier forma parti di e iniciativa pa registra y tuma contacto, enfatizando cu e meta ta pa crea un movimiento cu ta involucra comunidad den forma structural y cu atencion special pa generacion nobo.

Parlamentario Stephany Sevinger a recorda cu e prome dos edicionnan di Cuida Aruba a resulta den colecta di mas di 600 ton di sushi for di cayenan y diferente areanan di Aruba. El a haci un invitacion na comunidad pa bolbe participa diasabra, haciendo uzo di e puntonan di colecta y contribuyendo na bienestar comun y proteccion di naturalesa.

Den cuadro di organisacion di trafico, vocero suplente di Bureau City Inspector, Maurits Dijkhoff, a splica cu lo tin un sistema di entrada y salida na Centro di Bario Playa Pabou pa facilita flujo di vehiculo. Personal lo ta presente pa guia automobilistanan y indica unda cada tipo di sushi mester wordo deposita. Na otro puntonan di colecta tambe lo tin personal pa asisti publico.

Presidente di Centro di Bario Playa Pabou, Kenneth Simons, a expresa satisfaccion cu e centro por forma parti di e accion. El a invita habitantenan di Playa Pabou y resto di Aruba pa trece nan sushi na e punto di colecta y pa contribui activamente na un bario y un Aruba mas limpi. Segun Simons, ya ta visibel cu den diferente barionan tin progreso, pero participacion di cada habitante ta keda importante pa mantene e adelanto aki.

Vocero di DNM, Shahayra Croes, a pone enfasis riba e cadena di reciclahe y e responsabilidad comparti den manejo di desperdicio. El a splica cu, aunke e cadena di reciclahe na Aruba ainda no ta completamente sera, proyectonan manera Cuida Aruba ta contribui na un parti esencial di e proceso: separacion y colecta correcto di material.

E proceso ta cuminsa for di momento cu un producto wordo cumpra y uza, sigui pa colecta y procesamiento, cu e meta cu material por eventualmente bolbe drenta den cadena como materia prima of un producto nobo. DNM a enfatisa cu comunidad tambe tin un responsabilidad pa separa sushi na cas, evita bota desperdicio den naturalesa y explora posibilidadnan manera compost.

Un Aruba limpi no ta solamente importante pa proteccion di flora y fauna, pero tin un relacion directo cu salud publico. DNM a haci un yamada na comunidad y sector comercial pa mira tambe oportunidadnan pa inovacion y inversion den actividadnan nobo relaciona cu reciclahe di material.

Serlimar, cu su experiencia den colecta di sushi, ta forma parti di e operacion pa asegura cu e diferente fluhonan di desperdicio wordo maneha den forma organisa. E meta ta pa material cu ta drenta e puntonan di colecta wordo separa corectamente y dirigi den e fluho apropiado.

Den su palabra di clausura, Prome Minister Eman a enfatisa cu Cuida Aruba ta un esfuerso nacional y no un iniciativa cu mester pertenece solamente na Gobierno. El a expresa e deseo pa mira e representantenan di tur fraccion politico, e organisacionnan y e gruponan den comunidad participa den e accionnan den nan propio bario.

Segun Prome Minister, por tin diferente vision tocante con pa organisa pais y comunidad, pero cuida y stima Aruba ta un responsabilidad comparti. E creciente participacion di organisacionnan y boluntarionan ta demonstra cu e iniciativa ta cuminsa haya un luga den diferente faceta di comunidad.

Gobierno di Aruba ta invita comunidad pa participa activamente diasabra, haci uzo di e puntonan di colecta y, unda ta posibel, pone hunto man na obra den nan propio bario.

Cuida Aruba ta un esfuerso di tur hende: pa nos bario, nos naturalesa, nos salud y futuro di Aruba.