MEP a laga e situacion di personanan indocumenta y e impacto financiero riba nos sistema di cuido

Parlamentario di AVP, John Hart:

ORANJESTAD (AAN): – Fraccion di AVP a reuni cu directiva di Hospital Horacio Oduber (HOH) pa discuti e ultimo desaroyo, necesidad y preocupacionnan relaciona cu situacion financiero di hospital y continuidad di cuido medico na Aruba.

Segun parlamentario John Hart, acceso na cuido ta esencial pa cada ciudadano y e retonan financiero cu HOH ta enfrenta mester haya un solucion structural, sostenibel y responsabel.

“Laga mi pone e asunto aki bon cla: acceso na cuido no ta un luho. Hospital mester tin e recursonan necesario pa sigui brinda cuido sigur y di calidad, pero esaki mester sosode dentro di un sistema cu ta financieramente sostenibel y unda responsabilidadnan ta defini claramente,” Hart a declara.

Durante e reunion, HOH a indica cu actualmente tin mas di Afl. 29 miyon na gasto acumula pa cuido brinda na personanan cu ta keda na Aruba, pero cu no ta cay bou di AZV y cu, den hopi caso, no tin posibilidad pa paga nan tratamento. Segun hospital, esaki ta trata di costo real di cuido, sin margen di ganashi.

E gastonan aki a aumenta considerablemente durante e ultimo añanan: di aproximadamente Afl. 1,4 miyon na 2017 pa Afl. 5,1 miyon aña pasa. Te augustus di e aña aki, mas di Afl. 3 miyon adicional a acumula.

“E cifranan ta mustra cu esaki no ta un problema cu a nace awe. Durante añanan e problema a crece sin cu gobierno anterior a presenta un solucion definitivo. MEP a laga e situacion di personanan indocumenta y e impacto financiero riba nos sistema di cuido sin un solucion structural. Mescos cu HOFA, nan a laga e problema 90% cla,” Hart a expresa.

Actualmente, Minister di Salubridad a reuni cu directiva di HOH y AZV pa evalua diferente scenario. Parti di e proceso ta un analisis financiero independiente pa determina e necesidad real di fondo y e medidanan necesario pa garantisa continuidad di cuido.

Hart ta considera esencial cu resultado di e analisis wordo presenta na parlamento y forma parti di un debate amplio y transparente. Parlamento mester haya claridad tocante e magnitud real di e necesidad financiero di HOH, e causa di e gastonan acumula y obligacionnan existente, y e medidanan necesario pa garantisa continuidad y calidad di cuido.

Ademas, mester analiza con financiamento di cuido medico por keda pagabel, accesibel y sostenibel, tanto pa generacion actual como pa esnan futuro.

“Nos mester evalua si e marco legal actual ta duna suficiente claridad tocante responsabilidad di cada actor, sostenibilidad di financiamento y proteccion di acceso na cuido. E situacion actual ta un oportunidad pa habri un discusion mas amplio riba futuro di nos sistema di salud, incluyendo e legislacion di AZV,” Hart a indica.

Dentro di e discusion aki, e parlamentario ta considera importante pa evalua establecimento di un supervision independiente pa AZV. Un instancia di supervision independiente por contribui na mas transparencia, control efectivo y cumplimento cu ley.

“Nos meta mester ta un sistema di cuido cu ta accesibel pa pueblo, pagabel pa pais y sostenibel pa futuro. E crisis actual no mester wordo uza solamente pa tapa un buraco financiero, sino pa atende e problemanan structural cu durante demasiado tempo a keda sin solucion,” John Hart a conclui.