STA ta cla pa cuminsa negociacion di CAO nobo cu A.A.A. NV

Segun Diego de Cuba di Sindicato STA:

ORANJESTAD (AAN): Diego de Cuba di Sindicato STA a duna un actualizacion tocante e preparacionnan pa cuminsa negociacion di e contract colectivo cu Aruba Airport Authority, AAA NV. E contract colectivo actual ta valido te cu 31 di december 2026.

   De Cuba a indica cu STA a sinta na mesa cu AAA pa negocia un protocol. E protocol lo establece e reglanan y condicionnan necesario prome cu negociacion formal di e CAO cu aeropuerto. E partidonan envolvi a delibera riba e protocolo y a procesa e cambionan cu tabata necesario.

   E version mas reciente di e protocolo a wordo firma pa presidente y secretario di STA y manda pa AAA. Awor ta keda na AAA firma e documento y manda’e bek, pa negociacion di e contract colectivo por cuminsa oficialmente.

   “Nos tin e concepto di e CAO practicamente cla pa manda. Awor ta tumando luga e ultimo revisionnan, conhuntamente cu nos abogado tambe. E ta un CAO hopi bon hinca den otro manera cu semper nos a haci cu AAA NV,” De Cuba a indica.

   Segun De Cuba, e negociacion cu AAA lo no bay ta uno facil. E ta anticipa un negociacion fuerte, pasobra STA tin diferente cambio cu kier inclui den e contract colectivo nobo. Entre e puntonan importante tin mas proteccion pa trahadornan.

   De Cuba a enfatisa cu AAA NV ta un compania di Pais Aruba.

Sindicato STA kier logra mehoracion tanto den e parti social como den e condicionnan di trabao. Sindicato tambe kier mas proteccion pa personanan cu por wordo castiga inhustamente.

Otro punto menciona ta trabao di overtime. Segun De Cuba, un trahador no mester wordo obliga pa traha overtime, indicando cu esaki ta cos di pasado.

STA tambe ta trata di yega na un mehor acuerdo tocante e oranan di trabao. De Cuba a indica cu e punto aki ya a forma parti di discusionnan anterior y, aunke por tin diferencia di opinion, no ta imposibel pa yega na un solucion.

“Mi ta kere cu pronto nos lo sinta na mesa cu gerencia di aeropuerto pa atende e contract colectivo. Nos ta warda nan tuma contacto cu nos y, finalmente, firma e protocol y mand’e bek pa nos,” De Cuba a finalisa.