SKOA preparando dos evento importante pa docentenan relaciona cu desaroyo y innovacion den enseñansa

Clarisse Lopez di SKOA

ORANJESTAD (AAN): Diaranson atardi durante un conferencia di prensa convoca na sede di Fundacion SKOA, tanto Clarisse Lopez y tambe Ruzischka Tromp di e fundacion, a duna detaye di dos topico importante, cu ta e ‘Nationaal Onderwijs Congress’ y tambe e ‘Eduweek 2026’.  Dos evento hopi importante pa staf y personal di SKOA relaciona cu desaroyo y innovacion den enseñansa.

   Clarisse Lopez kende ta staffunctionaris onderwijs, a bisa cu maestronan ta un di e pilarnan mas importante pa e futuro di Aruba. E maestronan ta traha cu passion, curason, amor y ta duna hopi tempo energia pa asina contribui den desaroyo di nos muchanan.

   SKOA lo tin eventonan dedica specialmente na nos comunidad di enseñansa.  Esey ta debi cu e fundacion ta kere firmemente den e desaroyo professional di e maestronan.  Momento nan inverti den e maestronan, e ta un inversion directo den nos muchanan.

   Pues e aña aki nan ta organiza nos di 9 Congreso pa nos maestronan di SKOA.  Sigui cu nos Eduweek 2026 yena cu 3 dia di workshops pa e comunidad completo di enseñansa.

   Dos evento yena cu tayernan y charla di ambos experto nan local y international pa comunidad di enseñansa completo.