Armstrong International a identifica 3 campo di gas, parti noordoost di Aruba

​

Minister Glenbert Croes

*lo continua cu proceso di aprobacion den Gobierno di Aruba 

ORANJESTAD (AAN): Gobierno di Aruba aña pasa a anuncia di a wordo acerca pa Armstrong International, un compania Americano renombra di petroleo, cu e peticion pa por explora e posibilidad di gas y petroleo den awanan teritorial di Aruba, riba gasto di e compania. Segun nan propio investigacionnan, e posibilidad ta hopi grandi.

            Armstrong International ta un subsidiario di Armstrong Oil and Gas, basa na Denver, Colorado. Armstrong O&G ta un compania independiente cu un historia exitoso y experiencia substancial den exploracion pa hidrocarburos na Merca, incluyendo algun campo di petroleo gigante na Alaska. Esun mas recien ta e campo Pikka cu mas cu 2.5 biyon bari na e North Slope di Alaska. Pikka ta un di e descubrimentonan mas grandi na Merca den e ultimo decada.

            Gobierno di Aruba mediante su compania estatal Compania Arubano di Petroleo a firma un MOU y e fase inicial di investigacion y estudio a inicia utilisando tur e datonan geologico y geofisico disponibel. E estudio lo inclui un interpretacion di e datos sismico existente.

            Awe nos por anuncia cu Armstrong International a identifica 3 campo di gas, parti noordoost di Aruba.

            Awor cu e camponan a wordo identifica, lo continua cu proceso di aprobacion den Gobierno di Aruba, pa esaki por wordo concretisa lo antes posibel. Una bes e proceso di aprobacion di parti di Gobierno di Aruba keda finalisa, Compania di Petroleo Arubano lo invita Armstrong International pa bin Aruba pa por firma e acuerdo di exploracion.

            Manera Minister Glenbert Croes a declara: “Esaki ta un noticia hopi grandi pa nos Pais, un noticia cu lo cambia bida di nos yiunan, nan yiunan y generacionnan cu ta sigui.”

 galleryArmstrong International a identifica 3 campo di gas, parti noordoost di Aruba/gallery