Comerciantenan mester traha un plan di logistica pa evita tardansa ora di saca carga den temporadanan druk

The content originally appeared on: Diario

Herrick Henriquez, director di ATIA

ORANJESTAD (AAN): Recientemente Aruba Trade & Industry Association (ATIA) hunto cu Departamento di Aduana Aruba a inicia e proyecto yama “Optimalisacion di Relacion” (“Douane Relatie Optimalisatie Uurtje”) cu e idea cu tur comerciante por pasa libremente y haya informacion of haci pregunta specifico na e Management Team di Aduana sin compromiso, cu e meta final ta cu comerciante, brokers, y otro importador por crea un conexion y relacion mas personal cu Management Team di Aduana.

            Herrick Henriquez, Director di Aruba Trade & Industry Association (ATIA), a indica cu durante un sesion aki a trece dilanti e tema di carganan cu ta tarda pa sali, specialmente riba dianan di fiesta, na unda Aduana a trece di nan banda y comerciantenan a expresa di nan.

            Di e banda di comerciantenan ta importante pa bisa cu tin un factor cu den December tur aña nan ta enfrenta cu e shipping agent, hopi biaha door cu e ta un compania di Corsow e barco ta haya preferencia pa bay Corsow prome. E ora ey e ta bin Aruba mas laat, cu consecuencia cu e carga ta yega Aruba mas laat. Aña pasa e carga a yega 30 di December y a purba di sak’e dia 30 di December toch.

            Henriquez kier duna un tip na tur comerciante, cuminsa wak tur e dianan di ATV y cuminsa prepara pa esaki. Ta conoci cu November y December ta lunanan hopi druk, por ehempel, Black Friday ta na final di November, dus esnan cu ta cumpra riba Black Friday, companianan como tambe broker of consolidator, cuminsa educa e clientenan cu container ta sali for di Miami, diabierna mainta, kiermen cu tur e productonan mester ta na e consolidator riba diahuebs pa asina esaki por ta den container cu ta sali diabierna. 

            El a agrega cu riba Amazon mes por scoge ki dia un cliente ta desea pa haya su delivery, cu ta facilita e broker tambe. Si no mester warda riba e container di e proximo siman. E parti ey ta importante di ambos banda, dus di banda di Aduana pa yuda e comerciantenan, pero e comerciantenan por papia cu nan clientenan.          

            Di parti di Aduana, señor Croes tambe a papia riba esey y a señala cu riba dianan di fiesta specialmente ora cu tin hende ta tuma liber, ATV dag. Pero den su opinion, nan mester por yega na un consensus unda toch tin duanero disponibel, pa carga por sali. Pero como comerciante tambe, ta urgi pa haci e logistica bon. Ora esaki a bin dilanti, tin comerciantenan cu ya ta cumpra carga tin biaha hasta seis luna adelanta, pasobra nan ta cumpra via contract. Por ehempel, orange juice, un producto cu ta wordo cumpra via contract pa nan por haya algun luna despues. Esaki a bin dilanti pa motibo di e prijs cu ta wordo poni den declaracion pa Aduana. 

            Interesante pa remarca ta koers cu mester wordo calcula den caso di otro placa cu no ta dollar, ki koers ta wordo aplica.

            Segun Henriquez, varios tema a wordo treci dilanti cu a habri su wowonan y di e duaneronan tambe, unda nan a duna solucionnan practico pa e comerciantenan.