Parlamentario di AVP, Dennerich Kelly:
- Compensacion di 500 Florin ta e prome paso importante
ORANJESTAD (AAN): Parlamentario di Fraccion AVP y nurse Dennerich G. Kelly ta considera e compensacion mensual di Afl. 500 un prome paso importante pa famianan cu ta cuida un mucha cu necesidad di cuido intensivo. Parlamento di Aruba a ricibi e concepto di ley cu ta propone e compensacion pa mayornan y cuidadornan di muchanan menor di 18 aña cu ta cumpli cu e condicionnan legal. Kelly a dirigi 12 pregunta por escrito na e minister di Salud Publico, Asuntonan Social, Cuido di Adultonan Mayor y Cuido di Adiccion pa aclaria con e propuesta lo funciona den practica y con e sosten lo por atende e necesidadnan di e famianan durante e proximo cinco te dies aña.
Realidad diario di famianan: Pa algun mayor, e dia di cuido ta cuminsa ainda den anochi, ora nan mester lanta pa atende nan yiu. Otro mayor mester adapta su horario di trabao pa acompaña su yiu na terapia, bishita dokter y organiza cuido durante henter dia. Pa hopi di e famianan aki, e responsabilidad ta sigui dia tras dia, aña tras aña.
“Como nurse, mi sa cu un diagnostico no ta conta henter e storia di un pashent. Dos mucha por tin e mesun diagnostico, pero e cantidad di cuido cu nan mester por ta completamente diferente,” Kelly a expresa.
P’esey, e parlamentario ta pidi pa den e evaluacion tene cuenta cu e cuido cu cada mucha mester den su bida diario y cu e impacto cu e responsabilidad di cuido tin riba henter e famia.
500 Florin como prome paso: Segun Kelly, e compensacion por yuda famianan cu gastonan di transporte, terapia, cuido y materialnan necesario. E ta pidi pa evalua tambe e necesidad di guia profesional, cuido temporal pa duna cuidadornan un momento di descanso y miho coordinacion entre e instancianan cu ta brinda sosten. Pa mayornan cu mester combina trabao cu cuido, e acceso na e servicionan aki por haci un diferencia den nan rutina diario.
“Un mucha cu tin 17 aña y cu mester cuido intensivo no ta bira menos dependiente di cuido automaticamente ora e cumpli 18 aña,” Kelly a señala.
E parlamentario ta pidi pa prepara e transicion pa cuido na edad adulto, di manera cu famianan sa na tempo cua sosten ta disponibel y cua pasonan nan mester tuma. E ta pidi tambe pa haci un proyeccion di cuanto famia lo mester sosten durante e proximo cinco te dies aña, con e gastonan di cuido por cambia y con Aruba por prepara su sistema di salud y di sosten social pa atende e demanda.
E 12 preguntanan por escrito ta cubri e carga di cuido di e famianan, e sistema di evaluacion, cooperacion entre instancianan, acceso na cuido, transicion pa edad adulto y sostenibilidad financiero. Cu e preguntanan aki, Kelly kier contribui na un tratamento profundo di e proyecto di ley ricibi cu ta enfoca riba loke e famianan lo experencia ora e ley wordo aplica.
Kelly kier enfatisa cu e aprobacion di e ley no ta e final di responsabilidad di Parlamento. Un ley ta cuminsa cu un decision den Parlamento, pero su berdadero resultado mester wordo sinti den cas di e famianan cu e ley ta destina pa yuda.
“E meta mester ta cu un mama, un tata y un mucha por sinti cu nan no ta para nan so,” Kelly a conclui.