El a bira di 15 victima di accident fatal pa 2026
- Posibelmente a bay dal fuerte riba cura di Dump
ORANJESTAD (AAN): E prome yamada a drenta na 3:26 pm, pa indica cu riba e highway bieu di Playa pa San Nicolas, na altura di Dump na Parkietenbos un accident basta pisa a caba di socede, y cu un persona ta herida.
Mesora Central di Polis a manda patruyanan di Polis, y a notifica Centro di Alarma pa nan manda Ambulance tambe na e lugar. Dos unidad di Ambulance a sali pa e lugar.
Ora cu e prome patruya di Polis a yega, a bin topa cu e accident na un distancia di como 40 meter pabao di e entrada di e Dump, banda pazuid di caminda, unda un vehiculo ATV (‘Quadracer’) a baha di caminda, subi acera y dal violentamente contra e muraya nobo cu tin na Dump. Nan a bin haya e manehado masculino benta abao riba caminda, cerca di e acera.
Polis a mira cu e victima ta mustra grave y no tabata reacciona. Poco rato despues Ambulance a yega, y nan a baha cu nan material, incluyendo boter di oxigeno, pero ora di check e persona a nota cu e no tin señal vital mas, y nan no por haci nada mas pe. Nan a sugeri Polis pa manda busca Dokter.
Mientras tanto Polis a cera e caminda aki na Parkietenbos, y a manda busca Polis di Trafico, team forensico di BFTO, y tambe a notifica demas autoridadnan.
Poco mas despues di 1 ora cu e accident a wordo rapporta, esta pa 4:45 pm, Dokter Rivera a constata morto di e manehador di e ATV, y el a wordo identifica como Giovanni Raphael Dirksz, naci dia 25 di Maart 1975 na Aruba, pues tin 51 aña di edad. E victima tabata biba antes den area di Noord Cura Cabai, pero awor ta biba na Parkietenbos mes, poco mas pabao di e lugar di accident.
A manda busca personal di Bureau Slachtofferhulp tambe, debi cu famianan a yega eybao y nan tabata inconsolabel cu perdida di nan ser keri. Asina nan ta asisti famia di e victima den e momento dificil aki.
Vocero Liliana Rasmijn a indica cu esaki a bira e di 15 victima di accident fatal pa 2026. E causa di e accident ta bay wordo investiga, debi cu no tabatin testigo cu a mira e accident socede. Ta un automobilista yegando cerca a topa cu e accident y a bati alarma. Aunke por a mira cu parti di e decoracion di pilarnan tabata kibra abao, y e wiel banda drechi dilanti na e Quadracer tambe a kibra for di e suspension.
DIARIO y Cuerpo Policial Aruba ta manda palabra di condolencia na famia di e fayecido den e momento dificil.
https://diario.aw/categories/noticia/policial/accident-cu-vehiculo-atv-a-costa-bida-di-giovanni-dirksz-di-51-ana#sigProId41e456c8d6
Related News
Cuatro ekipo di studiante di FEF a ‘pitch’ inversionnan na hurandonan profesional
Accionnan por intensifica si no presenta solucion satisfactorio pa empleadonan di Wit Gele...
Ministro Hulandes a tene audiencia cu Gobernador
