Auto a perde control riba WVB Boulevard den sector di Paradijswijk

ORANJESTAD (AAN): Tabata Diamars atardi, alrededor di 3:00 pm cu Polis a wordo informa

cu riba e pida di WVB Boulevard for di Ponton pa Bushiri, un auto a haye envolvi su so den un accident, poco panort di sector di Paradijswijk.

   Yamadanan a drenta na Polis cu e auto a perde control, dal den e separador na su banda robez, y a sigui lastra bay mas pabao.  Hendenan ta indica cu tin hende herida.

   Debi cu e auto a keda pega mey-mey di caminda, trafico bayendo direccion pabao a stagna.  Polis cu sirena a logra yega rapido, y a bin topa cu un auto sedan di cuatro porta basta kibra parti dilanti, y na rand di e separador tin e chauffeur masculino sinta abao.

   Polis a compronde cu durante e impacto, e chauffeur sinta na banda drechi (auto ta un right-hand drive), a dal su cara fuerte y kizas por a fractura su nanishi, como cu e tabata sangrando.  A nota cu ambos Airbag parti dilanti den e auto a activa si den e impacto.

   Debi na trafico stagna, Ambulance a pasa basta dolor di cabez pa yega unda e auto a kibra.  E ora Polisnan cu yudansa di algun persona, a logra pusha e auto un tiki mas na banda, pa asina trafico por pasa trankil na parti patras.

   No ta conoci pakico e chauffeur a perde control.