Caso tocante ATVs y UTVs ta ignora derecho di doñonan di terenonan eigendom den zonanan concerni cu ta ser destrui

Caso ABC vs Gobierno y Aruba Conservation Foundation

• Doñonan di Wariruri ta exigi mas respet pa nan den e bataya di Off-Road 

ORANJESTAD (AAN): Siman ta cabando, pero ta mas desaroyo ta presenta nan mes den e asunto di dolor di cabez pa cu Touroperators di vehiculonan UTV y tambe e fundacion pa defende derecho di parhanan, y e fundacion encargacu Arikok.  Awor ta diferente doño di percela eigendom na e zona conoci como Wariruri tambe ta cuminza indica pa ningun instancia no perde respet pa nan tambe.

   Awor e grupo di doño aki, a duna e organizacion local di Rainbow Warriors Core Foundation di e conocido Milton Ponson, autorizacion pa actua na nan nomber, den buskeda di mas respet.

   E caso: Ta asina cu Stichting Aruba Birdlife Conservation, presidi pa Greg Peterson algun luna pasa a entabla un caso sumario contra Land Aruba (Gobierno) y Aruba Conservation Foundation (ACF) pa tuma medida pa para e uzo di UTVs y ATVs den e zonanan di costa norte for di Arashi, a lo largo di e costa panort di e isla te na unda Parke Arikok ta topa cu lama.

   E razon tabata ta cu Gobierno tin e deber di cumpli cu e Landsverordening Natuurbescherming y e entidad encarga cu maneho di areanan proteha, esta ACF, mester percura pa e areanan demarca como proteha mester keda liber di impactonan negativo y of destruccion.

   Pa añanan largo jeep tours, bus tours, y den e ultimo decada UTVs y ATVs den gran cantidad a cuminza bishita e areanan di costa norte y destrui areanan grandi natural, kibrando e vegetacion natural tipico di costa y cabando cu e paisahenan di duna.

   Aruba Conservation Foundation, en colaboracion cu NGO ambiental y di naturaleza a purba di para e mal practinanan aki, incluso via caso den corte, pero esaki no a duna e resultado desea, pasobra Gobierno no a percura pa regula e uzo di principalmente e UTVs y ATVs.  Greg Peterson y su organizacion a cuminza e caso contra Gobierno y ACF, pero ACF no ta e instancia culpabel den e caso aki, ya cu nan NO TIN autoridad pa actua en contra di esnan destruyendo naturaleza.

   E tour operators, sintiendo na mes menaza a cuminza un campaña publicitario den prensa y medionan social pa proteha nan porvenir, nan pan di cada dia.

   A yega asina leu cu Gobierno a reuni cu e tour operators na varios ocasion y a firma un acuerdo pa yega na un regulacion satisfactorio, garantizando tanto proteccion di naturaleza como e interes comercial di e tour operators.

   Situacion real: Segun Rainbow Warriors, e situacion berdadero no ta manera e ta ser pinta pa tanto gobierno como e tour operators.  E berdad cu a ser scondi ta cu Aruba Tourism Authority a crea e problema door di introduci den su rapport pa un strategia nobo pa turismo Cu Mira pa Futuro. “A Destination Management Plan 2017-2021” cu cuater concepto nobo pa categoriza e tipo nobo di turista pa bay atrae. E concepto di Curious Explorer a ser concretiza door di defini esaki como Adventurer/Explorer y a pone enfasis pisa y mercadeo enfocando riba explora e isla. Esaki directamente a crea e desaroyo rapido di adventure tours, cual na final ta ser practica riba cabay, den jeep, ATV of UTV tours.

   Areanan natural tabata ser promovi den mercadeo di ATA pa "descubri", manera Arashi, Tera Cora, Daimari, Boca Prins, Wariruri. Andicuri y Natural Bridge.  Y a completamente lubida cu algun area ta tereno eigendom, na unda NI Gobierno NI tour operator a respeta tereno eigendom.

   Den e caso di Wariruri cu ta tereno eigendom, a pone baricada pa stroba vehiculo drenta e tereno pa haya tanto entidad di Gobierno como tour operators bin kita e baricadanan pa permiti acceso na e tereno.

   Exigi respet: Rainbow Warriors aki ta indica cu mester respeta tereno eigendom y derecho di e doñonan como stakeholder.

   Tereno eigendom ta ser proteha den codigo civil, pero na Aruba, den nomber di e "adoracion di e Baca Sagrado di Oro" cu yama turismo, tereno eigendom no tin ningun valor ni pa Aruba Tourism Authority ni pa tour operators, y aparentemente tampoco pa e Minister di Infrastructura, Baba Herde.

   E siman aki Corte mester a convoca Aruba Birdlife Conservation, ACF, Gobierno y tour operators pa haya sa con a para di a yega na un regulacion satisfactorio pa tur partido.

   Rainbow Warriors Core Foundation a obtene un volmacht pa representa e doñonan di e tereno eigendom Wariruri cu ta practicamente completamente destrui door di tour operators, pa interveni directamente den e proceso aki y percura cu tur doño di tereno den e zonanan concerni nan interesnan ta ser respeta.

   Pa uza un expresion scucha for di boca di un Minister di Turismo, "no por ta asina cu un solo gremio, esta tour operators ta determina con ta haci tours como parti di turismo" ignorando derecho di doño di terenonan concerni, y esaki cu bendicion di tanto Minister di Turismo como Minister di Infrastructura.