‘Baseball in Paradise’ cu yamada pa comercio, gobierno, y comunidad

Alexander Lambrinos:

Alexander Lambrinos ta forma parti di e proyecto “Baseball in Paradise” cu ta un organizacion non profit. E meta di e organizacion aki ta pa yuda muchanan evita bay den mal caminda, of trece bek, esnan cu ta den caminda robes, riba e bon caminda. E ta un organizacion internacional, unda tin paisnan tabata na Aruba siman pasa como observador den eventonan deportivo, pa yuda e muchanan cu ta destaca, locual ta un orguyo pa Aruba.  Asina Lambrinos a duna di conoce den un entrevista.

   Alexander ta lamenta cu no tin suficiente comerciante cu ta poniendo e parti financiero, pa yuda carga e organizacion aki. El a reitera organizacion su meta no ta pa haci ganashi, pero ta claro cu e tin hopi gasto pa realiza tipo di eventonan manera nan a organiza di 11 pa 17 di October na, entre otro, Joe Laveist Sport Park, y den diferente distrito y a clausura na Pos Chiquito.

   Alexander ta pensa cu mescos cu e politiconan ta pidi sosten durante nan campañanan politico, e organizacion Baseball in Paradise, ta pidi sosten di e politiconan pasobra esaki ta pa un bon causa.

“E meta ta pa sigui cu e evento aki, pero pa e por sigui bira mas grandi ta ora pa mas comerciante y gobierno, ATA, AHATA, y tur hende duna un granito pa nos ta mas exitoso y por cubri e gastonan necesario. Un biaha mas, e meta di e organizacion no ta haci ganashi, pero si tin mas fondo, nos por haci hopi mas pa e mesun muchanan cu tin e necesidad ey”, Alexander a subraya.