Unit Narcotica a detene un sospechoso y confisca diferente tipo di droga

Entrada hudicial na Papaya:

ORANJESTAD (AAN):  Un homber di 22 aña a wordo deteni diamars 13 di oktober durante un entrada hudicial cu a wordo ehecuta pa Unit Narcotica di Cuerpo Policial Aruba na un percela na Papaya. Durante e accion policial, a confisca diferente tipo di droga, entre nan marihuana y MDMA.

Segun informacion di Cuerpo Policial Aruba, e sospechoso, cu ta di inicial A.G.W. y naci na Aruba, a wordo deteni bao sospecha di bendemento di droga.

Durante e registro di e percela, e agentenan a descubri un plantacion chikito di marihuana. Ademas, nan a haya un cantidad di marihuana y e substancia MDMA, tur cual a wordo confisca pa Polis como parti di e investigacion.

Pa ehecuta e operacion, Unit Narcotica a conta cu sosten di diferente departamento di Cuerpo Policial Aruba, entre nan e unidad K-9 y RRT.

Unit Narcotica ta sigui cu su trabounan pa combati bendemento di droga y otro actividadnan ilegal relaciona cu e tipo di delito aki.

Cuerpo Policial Aruba ta haci un yamada na comunidad pa coopera cu Polis den e lucha contra criminalidad. Personanan cu tin informacion of cu observa actividadnan sospechoso por yama e linea di informacion di Polis na 11141. Segun Polis, e persona cu suministra informacion por keda anonimo.