Polis a los tiro di advertencia den St. Maartenstraat pa calma grupo

Polis ta riesga nan bida ora di aresta figuranan peligroso

• Detene sospechoso cu arma di candela den su poder 

ORANJESTAD (AAN): Tabata Diamars mainta, cu un unidad di K-9 Unit di Cuerpo Policial a actua rapido, y a bay pa detene un sospechoso busca pa husticia den Caya St. Maarten. 

   Durante e detencion e sospechoso a resisti fuertemente contra polis di K-9 Unit.  E sospechoso tabata arma  cu arma di candela den su poder y no kier a coopera cu su detencion. Dado momento un grupo den sercania a cuminsa aglomera rond di polisnan cu menos bon intencion.

   Mirando e urgencia y peliger di e agentenan a los tiro di advertencia cu esaki e situacion a calma  y despues a logra pone e sospechoso den boei.

   A pidi pa refuerso y diferente unidad policial a yega na e lugar menciona den un corto tempo. Na e sitio tambe polis a haci un otro detencion pa un homber busca pa husticia cu tabata presente e momento ey.

   Cuerpo Policial Aruba ta  traha incansabelmente pa kita arma di candela for di riba caya.

   Ta haci un suplica na comunidad cu sa algo of a wak algo pa yama e tiplijn di polis cu ta 111-41.